Ухандаги тиббий назорат пости. Scmp.com сайти фотосурати
Пневмония касаллигини келтириб чиқарувчи янги вирус сабаб беркитиб қўйилган Хитой марказидаги Ухань шаҳридан чет эл фуқаролари эвакуация қилина бошланди. 29 январь куни эрталаб япон йўловчиларидан иборат самолёт Токиога йўл олган, деб хабар беради Japan News.
200 дан ортиқ японлар ўз ватанига қайтганлар. Касаллик тарқалган Хубэй провинциясида яна бир неча юз японлар қолган. Япония ҳукумати Хитой билан қўшимча авиарейслар уюштириш бўйича келишув олиб бормоқда.
Токиога етиб келган икки япон фуқаросида пневмония аломати сезилган, лекин уларнинг коронавирус билан касаллагани тасдиқланмади, деб хабар беради Reuters.
Хитой ҳукумати вирус туфайли марказий ҳудудлардаги ўндан ортиқ шаҳарни ёпиб қўйганди.
Улар билан транспорт алоқали деярли узилган. Карантин зонасида ўн миллионлаб хитойликлар, шунингдек, минглаб чет эл фуқаролари қолиб кетган (уларнинг орасида Марказий Осиёлик юзлаб талабалар бор).
Франция ва Жанубий Корея ҳукумати яқин кунларда Ухандан ўз фуқароларини қўчириб кетишга ҳозирлик кўрмоқда. Марказий Осиё мамлакатлари вакиллари ҳам ўз одамларини олиб чиқишга тайёр эканини билдирган, лекин бунинг аниқ санаси айтилмаган.
Ўтган йил декабрь ойида Хитойнинг марказий ҳудудида номаълум вирус эпидемияси бошланди. Сўнгги маълумотларга қўра, 6 мингдан ортиқ одам касалликка чалинган, улардан 130 дан ортиғи оламдан кўз юмган. Шунингдек, Европа, Осиё, Шимолий Америка ва Австралияда коронавирус билан касалланган одамлар аниқланган. Шу сабаб кўпчилик мамлакатларда чегара назорати кучайтирилган. Касаллик ўта оғир ва оғир ҳолатда кечиши мумкин. Хитой ҳукумати баёнотига кўра, енгил формадаги касалликни даволаш учун бир ҳафта, оғир формадагилари учун эса икки ҳафта ва ундан ортиқ вақт талаб этилади.
Қатор давлатларда янги вирусга қарши вакцина ишлаб чиқариш ишлари бошланган. Гонконглик олимлар вирусга қарши дори ишлаб чиқаришда ютуққа эришганлар. Лекин вакцинанинг керакли синовлардан ўтишига маълум вақт талаб этилади.
