Сергей Становкин. ИЦМ фотосурати
Ўзбекистон президенти Шавкат Мирзиёев ташаббуси билан Тошкентда ўтказилган «Ислом цивилизацияси: янги нигоҳ — янги кашфиётлар» халқаро медиафоруми мамлакат ва Марказий Осиёнинг халқаро ахборот маконида янада кенгроқ намоён бўлишига хизмат қилиши мумкин. Бу ҳақда BBC Studios компаниясининг Евроосиёдаги тижорат вакили Сергей Становкин маълум қилди, деб хабар беради Ўзбекистон Ислом цивилизацияси маркази матбуот хизмати.
Становкиннинг сўзларига кўра, йирик профессионал оммавий ахборот воситалари вакилларининг иштироки Ўзбекистонга ўз тарихи, маданияти ва цивилизацион мероси ҳақида хорижий аудиторияга бевосита сўзлаб бериш имконини беради.
«Профессионал оммавий ахборот воситалари вакилларини бир майдонга жамлаш ахборот муҳитида мутлақо бошқа натижа беради. Бугун блогерлик жадал ривожланаётган муҳим йўналишлардан бири бўлса-да, анъанавий ОАВнинг ўз аудиторияси, таъсир доираси, ишонч даражаси ва таҳририй сиёсати бор», — деди Становкин.
Унинг таъкидлашича, кейинги вазифалардан бири Марказий Осиё ва Ўзбекистоннинг халқаро медиа кун тартибидаги иштирокини кенгайтиришдан иборат бўлиши керак.
«Бунинг учун Ўзбекистон ва Ислом цивилизацияси маркази ўз овози, ўз контенти ва самарали коммуникацияларига эга бўлиши керак. Ахир Ислом цивилизацияси марказининг дунёга айтадиган гапи ва тақдим этадиган бой мероси бор», — деди BBC Studios вакили.
Становкиннинг фикрича, Ислом цивилизацияси маркази нафақат тадқиқот ва музей майдони, балки халқаро гуманитар мулоқот масканига ҳам айланиши мумкин.
BBC Studios вакили BBC телеканалида намойиш этилган «Ўзбекистон — цивилизациялар чорраҳаси» рекламавий кампаниясини ҳам эслатди. Унинг сўзларига кўра, Ислом цивилизацияси маркази гуманитар соҳада шунга ўхшаш вазифани бажариши — турли мамлакатлар вакилларини Тошкентга жалб этиши ва халқаро ҳамкорлик учун шароит яратиши мумкин.
«У нафақат мамлакатлар ўртасида, балки ўтмиш ва келажак ўртасида ҳам кўприк яратади. Тарихни англаш келажакни тўғри қуришга ёрдам беради», — деди Становкин.
Унинг фикрича, Ўзбекистонга халқаро қизиқиш ортиб бораётганининг сабабларидан бири мамлакатнинг фаоллиги ва тарихий мерос билан бир вақтнинг ўзида ишлаш ҳамда келажак кун тартибини шакллантиришга интилаётганидир.
«Айниқса, келажакка қаратилган қараш Ўзбекистонни ажратиб туради. Ўтмишни ўрганиш жуда муҳим, аммо келажак ҳақида гапириш ва ривожланиш йўналишини белгилаш ҳам шунчалик аҳамиятли. Ана шунда янги ҳамкорлар ва янги тарафдорлар пайдо бўлади», — деди Становкин.
Унинг қўшимча қилишича, айнан шундай ёндашув Ўзбекистоннинг халқаро алоқаларини кенгайтиришга хизмат қилмоқда.
«Ислом цивилизацияси: янги нигоҳ — янги кашфиётлар» халқаро медиафоруми август ойи охирида Тошкентда бўлиб ўтди. Унда ўнлаб мамлакатлардан журналистлар, медиа-менежерлар ва экспертлар иштирок этди. Форумнинг асосий майдонларидан бири Ислом цивилизацияси маркази бўлди.
ℹ️ Ислом цивилизацияси маркази Хасти-Имом мажмуаси ёнида қурилди. Иншоот қадимги меъморий обидалар шаклида бунёд этилди. Мажмуанинг тўрт томонида баландлиги 34 метрли пештоқлар, ўртада 65 метрли гумбаз қурилган. Бу ерда Қуръон зали, 550 ўринли анжуманлар зали ва музей мавжуд бўлиб, кўргазмалар Ўзбекистоннинг исломгача бўлган даврдан то ҳозирги кунгача бўлган бутун тарихини қамраб олади. ИЦМ Ўзбекистон халқаро исломшунослик академияси ва дунёнинг ихтисослаштирилган илмий-таълим марказлари билан ҳамкорликда аждодлар меросини ўрганиш, идрок этиш борасида маърифий масканга айланиши кўзда тутилган.
