Видеодан кадр
Жорий йили Фарғона вилоятида 98 минг доимий иш ўрни яратиш, 423 минг аҳолини даромадли қилиш ҳамда 74 минг иш ўрнини «соя»дан чиқариш режалаштирилган. Вилоят ҳокимлигига Бувайда, Учкўприк, Қува, Ўзбекистон, Ёзёвон туманлари ҳамда Марғилон, Фарғона, Қўқон ва Қувасой шаҳарларини ишсизлик ва камбағалликдан холи ҳудудларга айлантириш вазифаси қўйилди. Бу ҳақда президент Шавкат Мирзиёев вилоятни ривожлантириш бўйича йиғилишда сўз юритди.
Таъкидланишича, расмийлар камбағаллик ва ишсизликнинг икки баравар камайишига тўсқинлик қилаётган еттита туман ва 132 та маҳаллада инфратузилмани яхшилаш учун 800 миллиард сўм (65 миллион доллардан ортиқ) ажратади. Бундан ташқари, банклар 1,4 триллион сўм (тахминан 115 миллион доллар) кредит ресурслари тақдим этади.
Йиғилишда муайян ютуқларга олиб келган ислоҳотлар натижалари эълон қилинди. Таъкидланишича, 2017 йили аҳоли жон бошига ялпи ҳудудий маҳсулот ҳажми 2017 йилда 7 миллион сўмни (573 доллар) ташкил этган бўлса, 2025 йилга келиб, 26,6 миллион сўмга (2180 доллар) етган ёки 3,8 баробар ўсган.
Шу билан бирга, ўтган йили 519 минг киши иш билан таъминланган, бу эса 53 минг оилани кам таъминланганлар реестридан чиқариш имконини берган. Жорий йил охирига келиб, вилоятда ишсизлик 3 фоизгача, камбағаллик эса 2,7 фоизгача камайиши кутилмоқда.
Вилоятда йигирма олтита йирик ва 357 та кичик лойиҳа амалга оширилди, 1,2 миллиард долларлик хорижий инвестициялар ўзлаштирилди ва экспорт барқарор ўсиб бормоқда.
Фарғона вилоятида иқтисодий ўсишни қўллаб-қувватлаш учун умумий қиймати 8,2 миллиард долларга тенг янги йирик лойиҳалар пакети ишлаб чиқилган, шундан 4,2 миллиард доллари жорий йилда амалга оширилади. Саноатни ривожлантиришга 2,7 миллиард доллар, қишлоқ хўжалигига 210 миллион доллар ва туризм ва хизматларга 1,2 миллиард доллар ажратилади.
Президент айрим дастурларни танқид қилди. Масалан, у саноат учун ажратилган 2000 гектардан ортиқ ернинг 40 фоизи ҳали ҳам ким ошди савдосига қўйилмаганини айтди. У мутасаддиларга аввало инвесторларнинг қизиқишини ошириш учун мавжуд ер участкаларининг инфратузилмасини яхшилашни таклиф қилди.
Қишлоқ хўжалигида мақсад нафақат хомашё, балки юқори қўшимча қийматга эга маҳсулотларни ҳам етказиб бериш орқали мева-сабзавот экспортини 510 миллион долларга етказишдир. Шу мақсадда Фарғона ва Қувада хитойлик ҳамкорлар иштирокида агрологистика марказлари қурилади. Ушбу лойиҳанинг қиймати 175 миллион долларга баҳоланмоқда. Бир нечта туманларда чорвачилик, паррандачилик ва сутни қайта ишлаш лойиҳалари ишга туширилиши кутилмоқда.
Мирзиёев ижтимоий инфратузилмани ривожлантириш зарурлигини таъкидлади. Бу йил вилоятдаги 33 та мактабни қуриш ва таъмирлашга 343 миллиард сўм (28 миллион доллар) сарфланади. Ҳудуд раҳбарларига қўшимча имкониятларни ишга солиш ва хусусий секторни жалб қилиш орқали инфратузилмани яхшилаш вазифаси қўйилди.
Туризм салоҳиятини кенгайтириш мақсадида Сўх туманида Угам ва Мираки тажрибаси асосида туризм мажмуалари ташкил этилади, Фарғона туманида йирик туристик-рекреацион зона барпо қилинади. Қўқон шаҳрида янги туризм масканлари барпо этилиб, маданий мерос объектлари бўйлаб саёҳат маршрутлари йўлга қўйилади.
Ахборот технологиялари соҳасида Фарғона вилояти иқтисодиётининг муҳим драйвери сифатида АT йўналишини жадал ривожлантириш режалаштирилган. Ҳозирда вилоятда 139 та IT-парк резиденти фаолият юритмоқда. Жорий йилда ахборот технологиялари хизматларининг ҳажмини 3,5 триллион сўмга (287 миллион доллар), экспортни эса 30 миллион долларга етказиш мақсад қилинган. Бундан ташқари, Фарғона шаҳрида янги IT-парк, Марғилон шаҳрида халқаро IT университет қурилади.
