БРИКС давлатлари томонидан ташкил этилган Янги тараққиёт банки (ЯТБ) илк бор Ўзбекистон ҳукуматига кредит ажратади. Гап Марказий Осиё республикасининг кам углеродли энергетика тармоғини ривожлантириш бўйича лойиҳанинг дастлабки босқичини амалга оширишга қаратилган 300 миллион долларлик битим ҳақида бормоқда. Бу ҳақда халқаро молия ташкилотининг сайтида маълум қилинди.
Банк изоҳига кўра, маблағлар Ўзбекистоннинг шамол, гидро- ва атом энергетикаси йўналишидаги дастурларини молиялаштиришга йўналтирилади. Кам углеродли секторни ривожлантириш лойиҳаси мамлакат ҳукуматининг ички талабни қондириш ҳамда табиий газга бўлган қарамликни камайтириш мақсадида тегишли энергия манбаларидан фойдаланишни кенгайтириш бўйича саъй-ҳаракатларини қўллаб-қувватлайди. Шу билан бирга, режалаштирилган ҳаракатлар дастурининг ҳаётга татбиқ этилиши иссиқхона газлари чиқиндиларини қисқартиришга олиб келади.
Натижада, Марказий Осиё республикасининг 2030 йилгача мўлжалланган Тараққиёт стратегиясига тўлиқ ҳамоҳанг бўлган ушбу лойиҳа аҳоли ва саноат тармоқларини электр энергияси билан таъминлашни ошириш ҳисобига мамлакатнинг барқарор ижтимоий-иқтисодий ўсишига хизмат қилади.
«Мазкур кредит Янги тараққиёт банкининг энг янги аъзоси ҳамда Марказий Осиёдаги биринчи аъзо-давлати бўлган Ўзбекистон билан ҳамкорлигида муҳим қадам ҳисобланади», — дея қайд этди ЯТБ вице-президенти ва бош операцион директори Роман Серов.
У банк Ўзбекистонда янги молиявий воситалар ёрдамида инфратузилмани қўллаб-қувватлашга йўналтирилган лойиҳаларнинг салмоқли портфелини шакллантираётганини қўшимча қилди.
ℹ️ Янги тараққиёт банки 2015 йилда БРИКСнинг асосий иштирокчилари — Россия, Бразилия, Ҳиндистон, Хитой ва Жанубий Африка Республикаси томонидан тузилган. Унинг мақсади — ривожланаётган иқтисодиётга эга давлатлардаги лойиҳаларга ресурсларни жалб қилиш. 2021 йилда ЯТБ таъсисчи бўлмаган илк аъзоларни қабул қилди. Ўшандан буён бундай давлатлар сафи изчил кенгайиб келмоқда. Айни пайтда банк таркибига ўнта мамлакат киради: таъсисчилардан ташқари, булар Бангладеш, БАА, Миср, Жазоир ва Ўзбекистондир. Марказий Осиё республикаси ЯТБ сафига 2026 йилнинг июнь ойида қўшилган.
ℹ️ БРИКС (BRICS) — 2009 йилда ташкил этилган давлатлар иттифоқи. Бугунги кунда ташкилот сафига Бразилия, Россия, Ҳиндистон, Хитой, ЖАР, БАА, Эрон, Миср, Эфиопия ва Индонезия киради. Яна бир қатор давлатлар, шу жумладан Қозоғистон ва Ўзбекистон БРИКС ҳамкори мақомига эга.



