sputniknews.uz сайти фотосурати
Ўзбекистон ҳукумати ҳузуридаги Миграция агентлиги 20 октябрдан бошлаб фуқароларни Россия, Европа ва араб давлатларига ишга юбориш бўйича ўз хизматлари учун ноль тарифларни жорий этди. Бу чора ташкилий танлов асосида ишга кетаётган фуқароларга тааллуқли бўлиб, 2026 йил 31 декабрга қадар амал қилади. Бу ҳақда агентлик хабар берди.
Агентлик директори Мухсинхўжа Абдураҳмоновнинг буйруғида айтилишича, юқорида кўрсатилган давлатларга бориш истагида бўлган ўзбекистонликлар истисно тариқасида миграция хизмати кўрсатадиган хизматлар, жумладан, хорижга кетишга тайёргарлик, ўқитиш ва чет элда ишлашга мослашиш харажатларини тўлашдан озод қилинади. Айрим ҳолларда тегишли келишувлар мавжуд бўлса, харажатлар иш берувчи томонидан қопланиши мумкин.
Шу билан бирга, ташкилий танлов асосида бошқа давлатларга ишга юборишда қўлланиладиган тарифлар ҳам сезиларли даражада пасайтирилди. Идора таъкидлашича, янги тарифлар фақат 20 октябрдан кейин тузилган шартномаларга нисбатан амал қилади.
Жанубий Кореяда ишлашни режалаштираётганлар учун хизматлар анча арзонлашди. Илгари малакасиз ишчилар учун мўлжалланган E-9 визаси эгалари 50 та базавий ҳисоблаш миқдори (БҲМ) — 22 миллион сўм (1830 доллар) миқдорида тўлов қилган бўлса, энди хизматлар пакети 10 БҲМни, яъни 4,4 миллион сўмни (366 доллар) ташкил этади.
Миграция агентлиги аниқлик киритишича, E-7 визаси бўйича кетаётган фуқаролар — муайян касб бўйича маълумоти ёки иш тажрибасига эга мутахассислар учун ҳам янги тариф 10 БҲМдан ошмайди.
Японияда ишлашни режалаштираётган фуқаролар ҳам худди шу миқдорда тўлов қилади. Бироқ техник, гуманитар ва дипломатия олий таълим муассасаларини битирганлар учун тариф атиги 1 БҲМ, яъни 440 минг сўмни (36,6 доллар) ташкил этади.
20 октябрдан бошлаб агентликнинг қуйидаги давлатларга ташкилий танлов асосида ишга юбориш бўйича янги тарифлари ҳам кучга кирди:
✅ Исроил ва бошқа давлатлар — 10 БҲМ: 4,4 миллион сўм (366 доллар);
✅ Туркия — 3 БҲМ: 1,32 миллион сўм (110 доллар);
✅ Грузия — 2 БҲМ: 880 минг сўм (73 доллар);
✅ МДҲ давлатлари (Россия ва Беларусдан ташқари), шунингдек, Монголия — 1 БҲМ: 440 минг сўм (36,6 доллар);
✅ Беларусь — 0,1 БҲМ: 44 минг сўм (3,6 доллар).
Агентлик таъкидлашича, мазкур тарифлар фақат Ўзбекистон миграция хизмати кўрсатадиган хизматларга тааллуқли. Виза расмийлаштириш, авиачипталар, тиббий кўрик ва бошқа харажатлар меҳнат шартномаси шартларига мувофиқ алоҳида тўланади.
Янги тартиб чет элда қонуний ишлашни истаган фуқароларнинг қўшимча харажатларини камайтиришга қаратилган.
« Бизнинг асосий мақсадимиз — хорижда қонуний ишлаш имкониятларини янада кенгайтириш, фуқароларимиз учун хизматларни қулай, шаффоф ва молиявий жиҳатдан мақбул қилишдир», — дея таъкидлайди Миграция агентлиги вакиллари.
ℹ️ Жорий йилнинг август ойида эълон қилинган статистик маълумотларга кўра, хорижда тахминан 1,4 миллион нафар ўзбекистонлик меҳнат қилмоқда. Уларнинг қарийб 60 фоизи ёки 834 мингдан ортиғи Россияда ишламоқда. Яна 258 минг нафар ўзбекистонлик Европа давлатларида ишлайди. Меҳнат мигрантлари орасида Қозоғистон (тахминан 84,5 минг киши), Туркия (72 минг киши) ва Жанубий Корея (қарийб 46,5 минг киши) ҳам машҳур йўналишлар ҳисобланади.
