2026 йил бошидан буён Ўзбекистонда бешта янги газ кони очилди. Бу ҳақда 5 октябрь куни президент Шавкат Мирзиёев иштирокида бўлиб ўтган нефть ва газ тармоғида амалга оширилаётган йирик лойиҳалар юзасидан тақдимоти якунлари бўйича давлат раҳбари матбуот хизмати маълум қилди.
Ушбу конлардан бири Қорақалпоғистонда жойлашган Устюрт платосидаги Қоратау конидир. «Ўзбекнефтегаз» акциядорлик жамияти маълумотларига кўра, бу ерда чуқурлиги 4860 метргача бўлган 1-сонли қидирув қудуғи бурғиланди. 3 октябрь куни синов ишлари давомида 3273–3213 метр чуқурлик оралиғида қуйи юра қатламларидан саноат миқёсида табиий газ ва конденсат оқими олинди. Бу Қоратау янги газ-конденсат кони очилганини англатади.
Тақдимотда қайд этилишича, газ захираларини кўпайтириш мақсадида геология-қидирув ишлари кенгайтирилмоқда. Жумладан, жорий йилда 3D сейсмик разведка ишларининг ҳажми ўтган йилга нисбатан 5 баробарга ошириш режалаштирилмоқда. Йил бошидан бешта янги газ конлари очилди, ҳудудларда 6000 метргача ва ундан ортиқ чуқурликларга 80 та қудуқ бурғиланган бўлса, тўртинчи чоракда ушбу қудуқлардан яна 40 тасини бурғилаш режа қилинган.
Геология-қидирув ишларининг фаоллашиши газ қазиб олиш ҳажмининг пасайиши фонида кечмоқда. Миллий статистика қўмитаси маълумотларига кўра, 2026 йилнинг саккиз ойида Ўзбекистонда 24,2 миллиард куб метр табиий газ қазиб олинган. Бу ўтган йилнинг шу даврига нисбатан 16,3 фоизга кам.
Тақдимот давомида «Ўзбекнефтгаз» АЖ ва унинг йирик корхоналарининг молиявий натижалари таҳлил қилинди. Тўққиз ой якунларига кўра, уларнинг жами соф фойдаси ўтган йилнинг мос даврига нисбатан ошган. Кредит портфелини оптималлаштириш қарздорликни камайтириш имконини берган, фоиз ставкалари юқори бўлган кредитлар шартларини қайта кўриб чиқиш эса уларга хизмат кўрсатиш харажатларини қисқартирган.
Газ ташиш тизимининг ўтказувчанлик қобилиятини оширишга қаратилган лойиҳаларга ҳам алоҳида эътибор қаратилди. Улар янги магистрал газ қувурларини қуриш ва компрессор станцияларини модернизация қилишни назарда тутади. Ушбу лойиҳаларни амалга ошириш, жумладан, айрим станцияларда замонавий электр двигателларидан фойдаланиш газ таъминоти барқарорлигини ошириш ва йилига 125 миллион куб метргача табиий газни тежаш имконини беради.
Тақдимотдаги бошқа мавзулар қаторида Фарғона нефтни қайта ишлаш заводида (ФНҚИЗ) ишлаб чиқариш ҳажмини ошириш ва корхонанинг молиявий ҳолатини соғломлаштириш бўйича ишлар бориши ҳам кўриб чиқилди. Асосий технологик қурилмалар таъмирланиши натижасида заводда дизель ёқилғиси ишлаб чиқариш 30 фоизга, битум ишлаб чиқариш 60 фоизга, авиакеросин ишлаб чиқариш эса беш баравар ошган. Йил охирига қадар завод қувватларидан фойдаланиш даражасини 40 фоиздан 65 фоизгача ошириш, кейинчалик эса янада кўтариш режалаштирилди.
Фарғона нефтни қайта ишлаш заводи Марказий Осиёдаги йирик ёқилғи-мойлаш материаллари ишлаб чиқарувчиларидан бири ҳисобланади. 2022 йилда завод Saneg компаниясига 100 миллион долларга сотилган, бироқ инвестор маблағни тўлиқ тўламаган ва 2026 йил июнь ойида корхона давлат назоратига қайтарилган.
