M-Grass Ecology And Environment Group ва Green University ҳамкорлик тўғрисида келишув имзолади. gov.uz сайти фотосурати
Хитойнинг M-Grass Ecology And Environment Group корпорацияси Ўзбекистонда деградацияга учраган яйловларни тиклаш ва ерларнинг чўлланишига қарши кураш ишларида иштирок этади. Бу ҳақда Ўзбекистон Экология ва иқлим ўзгариши миллий қўмитаси матбуот хизмати хабар берди.
21 июль куни Тошкентда корпорация Ўзбекистоннинг Green University университети билан ҳамкорлик тўғрисида битим имзолади. Ҳужжат нафақат ерларни қайта тиклаш, балки уруғ ва кўчат етиштириш соҳасида қўшма лойиҳаларни ривожлантириш, шунингдек, экология соҳасига замонавий технологияларни жорий этишни ҳам назарда тутади.
Келишув имзоланиши «Ички Мўғулистонда экологик ҳимоя тўсиғини яратиш бўйича илғор тажриба» мавзусидаги тақдимот-кўргазма доирасида бўлиб ўтди. У Марказий Осиё атроф-муҳит ва экология тадқиқотлари марказида ташкил этилди.
Тақдимот иштирокчилари экологик барқарорликни таъминлаш, чўлланиш жараёнларининг олдини олиш, ўрмонзорлар майдонини кенгайтириш, деградацияга учраган ҳудудларни тиклаш ҳамда табиатни муҳофаза қилиш бўйича қўшма лойиҳаларни амалга оширишнинг замонавий ёндашувларини муҳокама қилди. Айниқса, ўрмон ва яйлов хўжалиги соҳасида инновацион технологиялар ҳамда илмий ишланмаларни жорий этиш масалаларига алоҳида эътибор қаратилди.
Кўргазмада Хитойнинг Ички Мўғулистон ҳудудида чўлланишга қарши кураш, қурғоқчил ҳудудларни кўкаламзорлаштириш ва ерларни қайта тиклаш бўйича эришган ютуқлари намойиш этилди.
2024 йили Хитой дунёда биринчи бўлиб деградацияга учраган ерлар майдони ўсишининг олдини олгани ҳақида хабар берилганди. Сўнгги 40 йил давомида мамлакатда чўлланишга учраган 4 миллион гектардан ортиқ ҳудуд қайта тикланди.
Бундай натижага «Уч шимолий ҳимоя камарлари» («Яшил Буюк девор» деб ҳам аталади) каби кенг кўламли дастурларни амалга ошириш орқали эришилди. Ушбу дастур Хитой шимолида ўрмонларни тиклаш ва чўлланиш ҳамда тупроқ эрозиясига қарши табиий тўсиқ яратишга қаратилган.
ℹ️ M-Grass Ecology and Environment Group — фаолияти экотизимларни тиклаш ва уруғ технологияларини ишлаб чиқиш билан боғлиқ бўлган Хитой компаниясидир. Компания бизнесининг асосий йўналишлари яйловларни экологик тиклаш, чўлланишга қарши кураш, бузилган ерларни рекультивация қилиш (жумладан, тоғ-кон ишланмалари ҳудудларини тиклаш), ўсимлик уруғларини сотиш ҳамда ўғитлар савдосини ўз ичига олади.
Green University — атроф-муҳит ва иқлим ўзгаришини ўрганиш бўйича Марказий Осиё университети бўлиб, 2023 йили Президент фармони билан ташкил этилган. Таълим муассасаси Тошкент туманида жойлашган бўлиб, барқарор ривожланиш, «яшил» иқтисодиёт ва экологик ҳуқуқ соҳаларида мутахассислар тайёрлайди.
