Ўзбекистон бир вақтнинг ўзида бир нечта бозорларда ўз иштирокини мустаҳкамлаган ҳолда Украина қишлоқ хўжалиги маҳсулотларининг асосий харидорларидан бирига айланмоқда. Жорий маркетинг йилининг биринчи учта квартали якунларига кўра, Марказий Осиё республикаси Украина шакарининг энг йирик хорижий импортчиларидан бирига айланган ва мазкур маҳслотнинг 12 фоизини сотиб олган.
Худди шу даврда Украина 504 минг тонна шакар экспорт қилган. Ўзбекистондан ташқари асосий харидорлар Ливан (21%), Европа Иттифоқи мамлакатлари (18%) ва Сурия (14%) бўлиб, экспортнинг ярмига яқини Яқин Шарқ мамлакатларига тўғри келади.
Open4business.com.ua нашри келтирган экспертлар Ўзбекистон томонидан талаб ортиб бораётганини логистика йўналишларининг ўзгариши ва Бирлашган Араб Амирликларидан минтақа мамлакатларига шакар етказиб беришнинг қисқариши билан боғлашади. Бу, уларнинг ҳисоб-китобларига кўра, Ўзбекистон Республикасининг Марказий Осиёда Украина шакарининг асосий бозорларидан бири сифатидаги роли мустаҳкамланганидан далолат беради
Шу билан бирга, Ўзбекистон Украинанинг музлатилган қорамол гўшти бўйича етакчи харидори бўлиб қолмоқда. Аgrotimes.ua нашри келтирган Украина Давлат божхона хизмати маълумотларига кўра, 2026 йилнинг январь-апрель ойларида республика ушбу маҳсулот импорт қилувчилари орасида Озарбайжондан (39,1 фоиз) сўнг 28,1 фоиз улуш билан иккинчи ўринни эгаллаган ва ҳатто Хитойдан (11,2 фоиз) ўзиб кетган. Умуман олганда, тўрт ой давомида Украина хорижга 5,7 минг тонна музлатилган мол гўшти етказиб берган – бу кўрсатгич бир йил олдингига нисбатан 6,6 фоизга кам, аммо пул кўринишида экспорт 13,1 фоизга ошиб, 25,9 миллион долларни ташкил этган.
