depositphotos.com сайти фотосурати
Қозоғистон президенти Қосим-Жомарт Тўқаев илгари Россия билан ҳамкорликда қурилиши режалаштирилган Кокшетау, Семей ва Уст-Каменогорскдаги ИEС қурилиши чўзилаётганини танқид қилди. Давлат раҳбари бу ҳақда энергетика соҳаси ходимлари билан учрашувда айтди, деб хабар беради Оқўрда.
«Биз Курчатовда иссиқлик электр станциясини ва Кокшетау, Семей ва Уст-Каменогорскда иссиқлик электр марказларини қуришимиз керак. Бу объектларнинг барчаси «тоза кўмир» технологиясидан фойдаланган ҳолда ишлаши керак. Бироқ, бу лойиҳаларни амалга ошириш кечиктирилмоқда ва мен буни қабул қилиб бўлмайдиган ҳолат, деб ҳисоблайман», — дея таъкидлади Тўқаев.
Республиканинг учта шаҳрида ИEС қуриш бўйича келишув 2024 йили имзоланган эди. Ҳужжатда Россиядан Қозоғистонга имтиёзли экспорт кредити берилиши кўзда тутилганди. Бироқ, ўтган баҳорда Қозоғистон Бош вазири ўринбосари Роман Скляр имтиёзли молияни олиш билан боғлиқ муаммолар борлигини маълум қилди. Унинг таъкидлашича, агар Россия томони маблағ ажрата олмаса, Қозоғистон янги инвесторларни қидиради.
Июль ойида Қозоғистон ўз кучи билан Кокшетауда иссиқлик электр станциясини қура бошлагани эълон қилди. Август ойида эса лойиҳа учун хитойлик пудратчилар ёллангани хабар қилинди.
Куни кеча Қозоғистон Энергетика вазири Ерлен Аккенженов ҳозирда мазкур ҳудудда қазиш ишлари олиб борилаётганини ва қурилиш майдончаси тайёрланаётганини маълум қилди. Шу билан бирга, унинг сўзларига кўра, Қозоғистон ҳалиям Россиядан қолган иккита иссиқлик электр станцияси — Семей ва Уст-Каменогорскдаги қурилиш учун имтиёзли кредит бўйича жавоб олмаган. «Қозоғистон томони бу масалани қулай пайтда кўтаради, аммо ҳозирча ҳукуматлараро имтиёзли кредит бўйича қарор қабул қилинмаган», — дея унинг сўзларидан иқтибос келтиради Tengrinews.kz нашри.
