Жавоҳир Синдаров. ФИДЕ фотосурати
19 ёшли ўзбек шахматчиси Жавоҳир Синдаров тарихда энг ёш Жаҳон кубоги ғолибига айланди.
ФИДE жаҳон рейтингида 22-ўринни эгаллаган ёш гроссмейстер 26 ноябрь куни бўлиб ўтган Жаҳон кубоги финалида 9-ўринни эгаллаган хитойлик шахматчи Вэй Ини мағлуб этди. Дастлабки иккита классик ўйин, биринчи тезкор ўйин каби, дуранг билан якунланди. Иккинчи ўйинда Синдаров рақибини қора фигуралар билан мағлуб этди. Жавоҳир ўйиндан сўнг дарҳол турнир залини тарк этди.
Турнирда ғалаба қозонгани учун ўзбекистонлик шахматчи 120 000 доллар мукофот пули олади. У 2026 йилги номзодлар турнирига йўлланма олган Ўзбекистоннинг биринчи вакили бўлди.
Жавоҳир Синдаров дунёдаги энг ёш гроссмейстерлардан бири ҳисобланади. У Ўзбекистон терма жамоаси билан 2022 йилги Жаҳон шахмат олимпиадасида ғолиб чиққан. 2024 йили у Ўзбекистон жамоаси билан бронза медалини қўлга киритди, бу яна бир ажойиб натижа ҳисобланади.
Кейинги Олимпиада 2026 йили Самарқандда бўлиб ўтади. Маълумки, Ўзбекистон ҳукумати нуфузли мусобақани ташкил этиш учун 4 миллион доллардан ортиқ маблағ ажратган.
ℹ️ Жаҳон кубоги ФИДE шафелигида ҳар икки йилда бир марта ўтказиладиган энг йирик шахмат турниридир. 2025 йили турнир Ҳиндистоннинг Гоа шаҳрида бўлиб ўтди. Мусобақада 206 нафар шахматчи иштирок этди. Аввалги Жаҳон кубоги ғолиби норвегиялик Магнус Карлсен эди, аммо у бу сафар турнирда қатнашмади.
