Жомарт Ертаев. Wikipedia.org сайтидан Станислав Алексеев фотосурати
2020 йили RBK Bankдан 144 миллиард тенге (266 миллион доллар)ни ўзлаштирганликда айбланган қозоғистонлик собиқ банкир Жомарт Ертаев амнистияга мувофиқ қамоқдан озод этилди. Бу ҳақда Tengrinews.kz нашрига ИИВ Жиноят-ижроия тизими қўмитаси маълум қилган. Ертаев кейинчалик назоратда бўлиши учун пробация хизмати рўйхатига олинган.
2020 йил ноябрида Ертаев Bank RBKдан миллиардларни ўзлаштирганликда айбланиб, мол-мулки мусодара қилинган ва 11 йилга озодликдан маҳрум этилган. Тергов маълумотларига кўра, у 2011 йилдан 2017 йилгача жиноятларни содир этган. Айтилишича, Ертаев Bank RBK бошқаруви раиси маслаҳатчиси сифатида сохта компанияга кредит олиш учун лоббичилик қилган. Унинг ўзи кредитлар берилишига ҳеч қандай таъсир кўрсатмаганлигини айтган. 2017 йили банк инқирозга юз тутганида, Ертаевдан қарзларни тўлаш ёки «Алмател Қозоғистон» («Алма-ТВ») телекоммуникация компаниясидаги улушларидан воз кечиш талаб қилинган. Кейинроқ унга нисбатан фирибгарлик моддаси бўйича жиноий иш очилган. Унинг ўзи эса шу йўл билан унинг бизнесини тортиб олишмоқчи бўлганларини айтган.
Тадбиркор ҳибсга олинишидан олдин сўнгги йилларда Россияда яшаган ва у ерда бир неча бор ҳибсга олинган. Дастлаб, 2018 йилнинг май ойида Ертаев уй қамоғига олинган, бироқ кейинроқ қўйиб юборилган ва унга қочқин мақоми берилган. Кейинроқ Ертаев бу мақомдан маҳрум қилиниб, яна ҳибсга олинган, яна уй қамоғига олинган, сўнгра тергов изоляторига ўтказилган. 2019 йил март ойида Ертаев Қозоғистонга экстрадиция қилинган ва ҳибсга олинган. Унинг ҳибсдаги муддати бир неча бор узайтирилган.
2021 йил март ойида собиқ банкир яна қамоқ жазосига ҳукм қилинган — бу сафар гаров сифатида сохта дон квитанциясидан фойдаланган ҳолда банк кредит пулларини ўғирлаш ҳолатида бўйича. У 9 йил қамоқ жазосига ҳукм қилинган. Шу билан бирга, суд биринчи жиноят иши бўйича Ертаевнинг жазосини енгиллаштирган — 11 йил ўрнига 9 йилга ҳукм қилган.
Натижада собиқ банкир беш йилни панжара ортида ўтказган.
Қозоқ оммавий ахборот воситалари Жомарт Ертаевни Қозоғистон собиқ президенти Нурсултон Назарбоевнинг тўнғич қизи – Дарига билан боғлайди. Бир неча йил давомида у Дариға Назарбоева ва унинг ўғли Нурали Алиевга тегишли «Алма-ТВ» МЧЖ бош директори лавозимида ишлаган.
