Жоэл Кожо. Lights Podcast каналига берган интервьюсидан фрагмент
2017 йили Ўшнинг «Алай» футбол клуби раҳбарияти жамоанинг энг яхши тўпурари, ганалик форвард, ҳозирда Қирғизистон терма жамоаси етакчиларидан бири ва Фарғонанинг «Нефтчи» клуби футболчиси Жоэл Кожо клубни алмаштирмаслиги учун унинг паспорти олиб қўйган. Футболчи алдов йўли билан ҳужжатларни қайтариб олган ва мамлакатдан қочишга мажбур бўлган. Бу ҳақда Кожонинг ўзи YouTubeдаги Lights Podcast каналига берган интервьюсида гапириб берди.
2017 йили Жоэл Кожо «Алай» билан шартнома имзолаган, 2018 йили эса мамлакат чемпионатининг энг яхши тўпурарига айланган.
«Улар алдов йўли билан паспортимни олиб қўйишди. Виза бермоқчи эканини айтишди. 2018 йилги мавсум охирида пул етишмаслиги сабаб, маошимни оширишларини сўрадим, чунки оиламга ёрдам бериб тураман. Лекин улар рад этишди. Менга кўпроқ маош тўлайдиган жамоани топоқчи бўлиб ҳужжатларимни қайтариб беришларини сўрадим. Шу ерда ҳам рад жавобини олдим. Шунда Ўшда яшаш зерикарли бўлгани учун Бишкекда яшамоқчи эканим ҳақида уйдирма ўйлаб топдим. Менга ишонишди ва ҳужжатларимни қайтариб беришди. Хонамга кираётганимда раҳбарият ўзаро гаплашиб, мени қўйиб юбормасликка қарор қилишаётганини эшитиб қолдим. Хонага киришим билан эшикни тақиллатишди. Мен нарсаларимни олдимда, меҳмонхона деразасидан ошиб қочиб қолдим. Бишкекка келдим ва у ердан Арманистонга учиб келдим», — деди футболчи.
Бироқ, Жоэл Арманистонда узоқ қолмади. У билан «Алай» боғланиб, яхши шароитларни таклиф қилишган. Унинг қўшимча мотивацияси ҳам бор бўлган — бу вақтга келиб у бўлажак рафиқаси билан Ўшда танишиб қолганди. Кожо Қирғизистонга қайтади ва 2021 йилгача «Алай»да ўйнайди.
ℹ️ Жоэл Кожо — асли Ганадан. 2017 йили Қирғизистонга кўчиб ўтган. «Алай» ва «Дордой»да ўйнаб, чемпионат тўпурари бўлган. Қирғизистон фуқароси билан турмуш қурган ва республика фуқаролигини олган. 2023 йили у спорт фуқаролигини ўзгартиради ва Қирғизистон терма жамоасига чақирилади. Ўша йили Самарқанднинг «Динамо» жамоасига ўтган. У жамоанинг Суперлигага қайтишига ёрдам берган. Кейинги йили эса Ўзбекистон Суперлигасининг энг яхши футболчиларидан бирига айланган. У рамзий терма жамоага киритилган. У Қирғизистон терма жамоаси сафида 25 та ўйин ўтказиб, 9 та гол урган.
