Фото с сайта freepik.com
Қозоғистон президенти Қосим-Жомарт Тўқаев сталкинг ва келин ўғирлаш учун жиноий жавобгарликни назарда тутувчи ўзгартиришларни имзолади, деб хабар беради Оқўрда матбуот хизмати.
Қонун лойиҳаси жиноий-ижроия қонунчилигини такомиллаштиришга қаратилган тўртта ўзгартиш блогини ўз ичига олади. У яқин кунларда матбуотда эълон қилинади.
Ҳужжатда биринчи марта «сталкинг» таърифи киритилган – бу шахс иродасига қарши у билан алоқа ўрнатиш ва (ёки) кузатиб бориш, зўравонлик билан боғлиқ бўлмаган, катта зарар етказмайдиган ҳаракатларда ифодаланган ноқонуний таъқибдир. Аввалроқ Бош прокурор ўринбосари Асет Чиндалиев бундай қилмишлар учун жарима ёки 90 суткагача қамоқ жазоси қўлланилишини айтган эди.
Худди шу қонун лойиҳасида Жиноят кодексига келин ўғирлаш учун жавобгарлик (модда «Никоҳга мажбурлаш» деб номланади) киритилади – бундай ҳаракат жарима, ахлоқ тузатиш ишлари, озодликни чеклаш, шунингдек, жиноятнинг оғирлигига қараб 10 йилгача озодликдан маҳрум қилиш билан жазоланади.
Шу пайтгача республикада бундай ишлар бўйича айбланувчилар одатда одам ўғирлаш моддаси бўйича судланган, унда 15 йилгача озодликдан маҳрум қилиш жазоси назарда тутилган. Бироқ, моддада ўғирланган аёлни ўз ихтиёри билан озод қилган шахс, агар унинг ҳаракатларида бошқа жиноят таркиби бўлмаса, жавобгарликка тортилмайди, деган банд бор.
Тузатишлар май ойининг охирида парламент қуйи палатаси томонидан кўриб чиқилди, июнь ойида Сенат томонидан маъқулланган эди.
