Нурбек Сатаров, Қирғизистон президентининг Норин вилоятидаги вакили. sputnik.kg сайти фотосурати
Қирғизистон президенти Садир Жапаров Норин вилоятидаги янги ваколатли вакил, Иссиқкўл вилоятининг Туп тумани, Тўқмоқ ва Қоракўл шаҳарлари ҳокимларини тайинлаш ҳақидаги фармонларни имзолади.
Нурбек Сатаров Президентнинг Норин вилоятидаги вакили этиб тайинланди. Бунгача Олтинбек Эргешов 2022 йил июлидан буён ушбу лавозимда ишлаб келаётган эди. У Тўқмоқ шаҳар ҳокими лавозимини эгаллади.
Эргешовнинг бу лавозимдаги ўтмишдоши Мақсат Нусувалиев 24 июнь куни Миллий хавфсизлик давлат қўмитаси (МХДҚ) раҳбари бошчилигидаги мажлисда қўлга олинганидан сўнг ишдан олинган эди. Унинг ҳибсга олинишига аҳолининг шаҳар парки қурилишининг кечикиши ва сифатсизлиги, шунингдек, муниципал лойиҳаларни амалга оширишдаги коррупциявий гумонлар ҳақидаги кўплаб шикоятлари сабаб бўлган.
Бунгача Туп тумани ҳокими лавозимида ишлаб келган Қанибек Адиев Тимур Мадяров билан ўрин алмашди: Адиев Қоракўл шаҳрининг янги ҳокими бўлди, бу лавозимни эгаллаб турган Мадяров эса Туп туманини бошқарадиган бўлди.
