Марат Омаров. sports24.kz сайти фотосурати
Қозоғистон футбол федерацияси (ҚФФ) президенти Марат Омаров мамлакатда олдиндан келишилган ўйинлар муаммоси борлигини тан олди. Бу ҳақда Sports24.kz хабар берди.
Яқинда Қозоғистон терма жамоаси матбуот котиби ва машҳур шарҳловчи Ермуҳаммед Маулен томонидан «келишилган ўйинлар» ташкил этилаётгани мавзуси кўтарилган эди. Унга кўра, клуб директорлари ёмон ҳакамликдан нолишади, кейин эса ўзлари ҳакамлар билан боғланиб, келишилган ўйинларда қатнашадилар. Шарҳловчининг фикрича, деярли барча клублар шундай қилади, иккинчи дивизионда эса ҳар иккинчи ўйин келишилган бўлади. Баъзи ҳамкасблар Мауленни танқид қилиб, ундан исбот, далиллар келтиришини талаб қилишган. 25 июнь куни Маулен терма жамоадаги ишини тарк этган.
Бироқ, 27 июнь куни ҚФФ президенти Марат Омаров Мауленни қўллаб-қувватлади.
«Келишилган ўйинларга келсак, шуни айтишим мумкинки, «Спорт Радар» деган ташкилот бор. Мазкур ташкилотнинг статистик маълумотларига кўра, Қозоғистон келишилган ўйинлар бўйича дунёда тўртинчи ўринда эканини айтишим мумкин. ҚФФ бу билан фаол курашмоқда, шунинг учун Ермуҳамед айтганларида ҳақиқат бор. Айни пайтда федерация бундай ўйинларга қарши курашмоқда. Жиноий иш очишга қадар жазони кескинлаштиришга оид қонун лойиҳаси ишлаб чиқилди ва у депутатлар ва тегишли органлар билан муҳокама қилинмоқда», — деди Омаров.
Кўпинча келишилган ўйинлар пул тикиш орқали даромад олиш мақсадида букмекерлик идоралари томонидан ташкил этилади, гарчи уларнинг ўзлари «келишилган» ўйинларга қарши курашаётган бўлсаларда. Бироқ, тил бириктирганлик фактини исботлаш жуда қийин, чунки иштирокчилар у ёки бу тарзда бир-бири билан боғланган ва бундай маълумотларни тарқатишдан манфаатдор эмас.
