freepik.com сайти фотосурати
Қозоғистон сенаторлари жиноий қонунчиликка сталкинг учун жавобгарликни назарда тутувчи ўзгартиришларни икки ўқишда маъқуллади, деб ёзади КазИнформ.
Агентлик ҳужжатдаги сталкинг тушунчаси талқинини келтириб ўтади. Бу «шахс иродасига қарши у билан аалоқа ўрнатиш ва (ёки) кузатиб бориш, зўравонлик билан боғлиқ бўлмаган, катта зарар етказмайдиган ҳаракатларда ифодаланган ноқонуний таъқиб».
Бош прокурор ўринбосари Асет Чиндалиевнинг сўзларига кўра, бундай қилмишлар учун жарима ёки 90 суткагача қамоқ жазоси қўлланилади. «Ҳа, биз сталкинг учун жиноий жавобгарликни жорий қиляпмиз. Бу бир одамнинг қўнғироқ қилиш, эргашиш, ижтимоий тармоқларда, кўчада кузатиш орқали бошқа одамга тинчлик бермаслик орқали намоён бўлади. Биз бундай таъқиблар ортидан юзага келиши мумкин бўлган янада оғирроқ жиноятларнинг олдини олиш учун жазо жорий қилмоқчимиз», — дея унинг сўзларини келтиради Tengrinews.kz.
Худди шу ҳужжатда Жиноят кодексига келин ўғирлаш учун жавобгарлик киритилган (модда «Никоҳга мажбурлаш» деб номланади) – унда жарима, ахлоқ тузатиш ишлари, озодликни чеклаш, шунингдек, жиноят оғирлигига қараб 10 йилгача озодликдан маҳрум қилиш жазоси назарда тутилган.
Қонун лойиҳаси парламент қуйи палатаси томонидан май ойи охирида кўриб чиқилган. Сенат томонидан қабул қилингандан сўнг у президентга имзолаш учун юборилади.
