Владимир Путин халқаро ахборот агентликлари раҳбарлари билан учрашувда. kremlin.ru сайти фотосурати
Россия президенти Владимир Путин Ўзбекистон раҳбари Шавкат Мирзиёев билан Россия Федерациясида ишлаш истагида бўлган меҳнат мигрантларини биргаликда тайёрлаш бўйича келишиб олганини маълум қилди. Гап рус тили, маданияти ўрганиш ва бошқа масалалар ҳақида кетмоқда, дея унинг сўзларидан иқтибос келтиради Путин матбуот хизмати.
Россия президенти Санкт-Петербург халқаро иқтисодий форуми доирасида ЎзА ахборот агентлиги бош директори Абдусаид Кучимов саволларига жавоб бераркан, меҳнат миграцияси мавзусини кўтарди.
Сиёсатчи Россия ва Ўзбекистон бу соҳада яқин алоқада ҳаракат қилиш ниятида эканига айтди. Путин таъкидлашича, давлат раҳбарлари меҳнат бозорининг ёмонлашуви фонида миграция масалаларини биргаликда ҳал қилади.
«Биз Шавкат Миромонович билан миграция масалаларини биргаликда ҳал қиламиз, деб келишиб олдик. Нега? Чунки бугун меҳнат бозоримиз қандай ҳолатда эканини биламиз. Сизларда ҳам маълум даражада босим бор», — дея тушунтирди президент ўзбекистонлик журналистга.
Давлат раҳбари иккала давлат РФда ишлаш истагида бўлган мигрантларни тайёрлаш бўйича тадбирлар ташкил этишига умид билдирди.
«Бу рус тили, рус маданияти ва бошқаларни ўрганишга тегишли», — дея қўшимча қилди Путин.
Россия Федерацияси раҳбари ёшлар билан ишлашга алоҳида эътибор қаратди ва буни муҳим ва қимматли деб атади. У яқинда Ўзбекистон раҳбари ёрдамчиси Саида Мирзиёева Москвада бўлганида президент администрацияси ходимлари ва Россия ҳукумати вакиллари билан бир қатор учрашувлар ўтказганини эслади.
«У президент топшириғига кўра, ёшлар ўртасидаги алоқаларни ривожлантиришга, таъбир жоиз бўлса, ёшлар йўналишини ривожлантиришга катта эътибор қаратмоқда. Бу ерда аниқ таклифлар бор, биз бу борада албатта бирга ишлаймиз», — деди Путин.
Россия президенти Ўзбекистон билан ҳамкорлик мавзусини давом эттирар экан, икки давлат ўртасидаги муносабатлар муваффақиятли ва изчил ривожланиб бораётгани, ҳамкорлик юксак босқичга кўтарилгани, мамлакатлар ўртасида кўплаб қўшма лойиҳалар, жумладан, ядровий соҳада ҳам амалга оширилаётганини таъкидлади.
