yuz.uz сайти фотосурати
Ўзбекистоннинг тўрт шаҳрида фуқаролардан Ҳаж зиёрати учун пул ундирган фирибгарлар қўлга олинди. Бу ҳақда Xavfsizlik Telegram-канали хабар берди.
Давлат хавфсизлик хизматининг Андижон вилояти бўйича бошқармаси ҳамда ички ишлар органлари ҳамкорлигида ўтказилган тезкор тадбирда, Андижон шаҳрида яшовчи, 1966 й.т., муқаддам бир неча маротаба судланган шахс алдов йўли билан ўзгаларнинг ишончига кириб, ҳозирда фаолият юритмаётган Андижон шаҳридаги туристик фирма номидан 10 нафар фуқарони Ҳаж зиёратига юборишини айтиб, эвазига ҳар бири учун 5 минг АҚШ долларидан жами 50 минг АҚШ доллари олган вақтида ашёвий далиллар билан ушланган.
Қашқадарё вилоятида фуқаролар ишончига кириб, Тошкент шаҳридаги танишлари орқали Ҳаж сафарига жўнатиш учун одамлардан 14 минг АҚШ долларини ундириб олган тадбиркор жавобгарликка тортилган.
Наманганда маҳаллий туроператорлардан бирининг менежери 2 нафар фуқарони Саудия Арабистонига Ҳаж амалларини адо этиш учун юбориш эвазига 20 минг АҚШ доллари талаб қилиб, олдиндан 10 минг АҚШ доллари олган вақтида ДХХ ва ички ишлар органлари томонидан ушланган.
Тошкент шаҳрида фаолият юритувчи туристик фирма ишчиси Фарғона вилоятининг Тошлоқ туманида яшовчи фуқаронинг ишончига кириб, уни Ҳажга юбориш эвазига 9 минг АҚШ доллари олаётган вақтида ушланган.
Ҳозирда фирибгарларга нисбатан жиноят иши қўзғатилиб, тергов ҳаракатлари олиб борилмоқда.
Ўзбекистон расмийларига кўра, биргина жорий йилнинг дастлабки уч ойида ноқонуний зиёрат сафарларини ташкил этиш бўйича 34 та жиноий иш очилган. 53 та компания фаолияти тўхтатилган, 46 нафар шахс жавобгарликка тортилган.
Ўтган йилнинг ноябрь ойида Ўзбекистон Дин ишлари бўйича қўмитаси диндорлар учун зиёрат сафарларини ташкил этиш учун лицензия олган туроператорлар рўйхатини эълон қилган эди. Ўша пайтда рўйхатга 12 та компания киритилган эди. Уларнинг ярми Тошкентда, учтаси Наманганда, биттадан Урганч, Андижон ва Марғилонда жойлашган.
Ўшанда қўмита муқаддас жойларга ноқонуний хизматлар кўрсатганлик учун 200 базавий ҳисоблаш миқдорида – 75 миллион сўм (тахминан 6 минг доллар) миқдорида жарима солинишини эслатиб ўтганди.
ℹ️ 2025 йилги Ҳаж мавсуми май ойи ўрталарида бошланган ва 9 июнга қадар давом этади. Саудия Арабистони Ўзбекистонга 15 минг зиёратчи учун квота ажратган. Бундан ташқари, фақат бундай фаолиятни амалга ошириш лицензиясига эга туроператорлар одамларни Маккага юбориши мумкин.
