Мансур Мингелов. hronikatm.com сайти фотосурати
Маҳкум туркман ҳуқуқ ҳимоячиси Мансур Мингеловга нисбатан қийноқлар қўлланилгани ҳақидаги хабарлар тасдиқланмади. Бу ҳақда 23-24 апрель кунлари Женевада бўлиб ўтган БМТ Қийноқларга қарши қўмитасининг 82-сессиясида Туркманистоннинг БМТдаги доимий вакили Вепа Хаджиев маълум қилди, деб ёзади Turkmen.news нашри.
Хаджиев Туркманистон ҳуқуқ-тартибот идоралари Мингеловга нисбатан инсон ҳуқуқларининг бузилиши, жумладан, этник келиб чиқишига кўра қийноқлар ва шафқатсиз муомалалар бўйича тергов ўтказганини, аммо бу қоидабузарликларни тасдиқловчи фактлар топилмаганини таъкидлаган.
Доимий вакил, шунингдек, Мингеловга икки тизза бўғимларининг сил касаллиги ташхиси қўйилгани ҳақида хабар берган.
«Маҳкумга ташхис қўйилган ва унга маълум қилинган: чап ва ўнг тизза бўғимларининг сил касаллиги. Туркманистон Жиноят кодексининг 76-моддасига кўра, маҳкумларни зудлик билан озод қилиш учун жазони кейинги ўташга тўғри келмайдиган касалликнинг мавжудлиги асос бўлади. Бу масала бўйича қарор идоралараро комиссия тиббий хулосасига асосан суд томонидан қабул қилинади», — дейди дипломат. У Мингеловнинг касаллиги озодликка чиқиш учун асос бўлиши ёки йўқлигига аниқлик киритмаган.
ℹ️ Мари вилоятида яшовчи Мансур Мингелов ёшлигиданоқ ўзи мансуб бўлган этник озчилик — балужлар ҳуқуқларини ҳимоя қилиб келган. У биринчи марта 2012 йил июнь ойида гиёҳванд моддалар контрабандасида гумонланиб ҳибсга олинган. Ҳибсга олиш пайтида у калтакланган ва оёғи синган. Икки ҳафтадан сўнг у жиноят далили топилмаган ҳолда қўйиб юборилган. Озодликка чиққандан сўнг Мингелов қийноқлар ва балуж халқига нисбатан қўпол зўравонлик ҳолатлари, жумладан, электрошок, калтаклаш ва бошқа қийноқлар қўллангани ҳақида шикоят қилган. Кейинроқ у қайта ҳибсга олинган ва бир қатор жиноятлар, жумладан, наркотик моддалар контрабандаси ва порнография тарқатишда айбланган. Ҳуқуқ ҳимоячилари буни сохта айбловлар деб аташган. 2012 йили у 22 йиллик қамоқ жазосига ҳукм қилинган.
2018 йили Мингеловга сил касаллиги ташхиси қўйилган, у оёқ остеомиелитлари билан асоратланган. Қамоқхона касалхонасига ўтказилганига қарамай, оёқ-қўлини кесишдан бош тортгани учун уни мунтазам равишда қаттиқ режимли қамоқхонага қайтариш билан таҳдид қилишган. 2024 йили Туркманистон Ички ишлар вазирлигининг тиббий комиссияси ташхисни тасдиқлаган ва мамлакатда бу касаллик даволанмаслигини, аммо ампутацияга зарурат йўқлигини маълум қилган. Маҳкум оёғини чет элда сақлаб қолиш мумкин бўлган.
Turkmen.news нашрининг таъкидлашича, президентнинг 2017 йилдаги қарорига кўра, бундай оғир хасталикка чалинганлар тиббий рухсатнома билан озод этилиши керак. Бироқ, Мингеловга ташхис қўйилган расмий ҳужжат берилмаяпти, бу эса унинг озод қилинишига тўсқинлик қилмоқда.
Халқаро инсон ҳуқуқлари ташкилотлари, БМТ Инсон ҳуқуқлари қўмитаси ва АҚШ сенаторлари Мингеловнинг иши инсон ҳуқуқлари поймол этилиши ва уйдирма айбловлар намунаси эканини таъкидлаб, уни озодликка чиқаришга бир неча бор чақиришган.
