рақамли сом. economist.kg сайти фотосурати
Қирғизистон президенти Садир Жапаров Миллий банк тўғрисидаги конституциявий қонунга рақамли сомдан фойдаланишга рухсат берувчи тузатишларни ҳозирча синов режимида тасдиқлади. Бу ҳақда давлат раҳбари матбуот хизмати хабар берди.
Миллий банк рақамли сомни чиқариш, уни чиқариш тартибини белгилаш ва махсус платформани юритиш бўйича мутлақ ҳуқуқни қўлга киритди. Рақамли сом қонуний тўлов воситаси бўлади ва Миллий банкнинг ўзи бошқарадиган платформада фақат рақамли шаклда муомалада бўлади.
Регулятор назорат остидаги ташкилотлар учун тўловларни амалга ошириш қоидаларини ва фирибгарликнинг олдини олиш учун крипто-ҳимоя белгиларини ишлаб чиқади.
Миллий банкнинг фикрича, рақамли валюта мамлакат молия тизимини сезиларли даражада яхшилашга ёрдам беради. У миллий валютанинг анъанавий шаклларини алмаштирмайди, балки уларни тўлдиради ва шу билан бирга молиявий операцияларни осонлаштиради.
ℹ️ Қирғизистонда рақамли сомни қонуний тўлов воситаси сифатида жорий этиш зарурати сўнгги бир неча йил давомида муҳокама қилинмоқда. Ўтган йил октябрь ойида Миллий банк рақамли валютадан фойдаланишга қаратилган қонун ҳужжатларига ўзгартиришлар киритиш лойиҳасини жамоатчилик муҳокамасига тақдим этганди. Рақамли сомнинг расмий муомалага чиқарилиши 2027 йили бошланиши режалаштирилган эди.
