autogrodno.by сайти фотосурати
Беларусда янги жиноий иш юзасидан юзлаб Туркманистон фуқароларининг мамлакатда қонуний яшаётгани текширилади. Маълум бўлишича, 2022 йилдан бери Минск такси компаниялари эгалари уч нафар мигрант иштирокида Туркманистон фуқаролари ва бошқа хорижликларга сохта таклифномалар ва меҳнат шартномаларини сотиш билан шуғулланган. Улар ўз навбатида ушбу ҳужжатлар орқали виза, яшаш учун рухсатнома ва бошқа ҳужжатларни расмийлаштиришган. Бу ҳақда Беларусь Тергов қўмитасига таяниб, БEЛТА хабар берди.
Тергов маълумотларига кўра, ноқонуний миграцияни уч нафар минсклик тадбиркор уюштирган. Чет элликлар улардан олган таклифномаларни мамлакатга виза олиш учун фойдаланишган, шартномалар эса вақтинчалик яшаш рухсатномаси ёки доимий яшаш рухсатномани олиш учун қўлланилган. Аслида чет элликлар бу компанияларда ишлашмаган, аксинча, иш берувчиларга ҳар ой иш билан таъминланганликларини «узайтиргани» учун ҳақ тўлашган.
Тадбиркорлар учун мижозларни худди шундай тарзда мамлакатга кириб келган воситачилар топишган. Улар чатларда Беларусда муаммосиз ўрнашиб олиш мумкинлиги ҳақида маълумотлар тарқатишган.
Ҳужжатлар учун дастлабки тўлов 150 доллар (тахминан 3000 манат) бўлган. АвтоГродно нашри туркман тилида меҳнат шартномаси учун 100 доллар тўлаганини айтган эркакнинг сўроқ пайтидаги видеосини чоп этган.
Схеманинг барча иштирокчилари ҳибсга олиниб, уларга нисбатан Беларусь Жиноят кодексининг 371-1-моддаси 2-қисми («Ноқонуний миграцияни ташкил этиш, уни такроран содир этиш») бўйича жиноий иш қўзғатилган. Қоидабузарлар 7 йилгача қамоқ жазосини олиши мумкин.
Гумонланувчилар тергов билан ҳамкорлик қилишмоқда ва уларнинг кўрсатмалари асосида ҳуқуқ-тартибот идоралари мазкур хизматдан фойдаланган хорижликлар ҳужжатларини текширишмоқда. Бир неча юзлаб одамлар бор, уларнинг аксарияти Туркманистон фуқаролари. Беларусь миграция қонунчилигини бузиш жарима ва депортация билан жазоланади, Туркманистон фуқаролари била туриб сохта расмий ҳужжатлардан фойдаланганликда айбдор деб топилса, улар жиноий жавобгарликка тортилади.
👉 2024 йили турли мамлакатлардан Беларусга келган меҳнат муҳожирлари сони бўйича Туркманистон фуқаролари етакчилар қаторидан жой олган – 16,3 минг киши. Бу барча меҳнат мигрантларининг деярли ярмини ташкил этади, жами 33,8 минг киши мамлакатга келган. Эслатиб ўтамиз, 2024 йил Туркманистон фуқароларининг Беларусга келиши бўйича рекорд йил бўлган. Бир йил аввал туркманлар сони атиги 2,1 минг киши бўлган, бу ҳозирги кўрсаткичлардан 8 баравар кам.
Бошқа давлатлар вакилларига келсак, Россия фуқаролари етакчидан анча орқада (4,1 минг киши) иккинчи ўринда. Улардан кейинги ўринни Хитой (2,8 минг), Украина (2,5 минг) ва Ўзбекистон (2 минг) фуқаролари эгаллаган.
👉 Қайд этиш лозим, 2024 йил Беларуснинг 2023 йил ўрталарида кучга кирган «Ташқи меҳнат миграцияси тўғрисида»ги янги қонуни тўлақонли ишлаган биринчи йил бўлди. Бу қонун бир нечта тоифа чет элликларга махсус рухсатномаларсиз Беларусь меҳнат бозорида ўз фаолиятини соддалаштирилган тартибда қонунийлаштиришга имкон беради. Иш берувчи фақат меҳнат шартномасини тузгани тўғрисида ҳукуматни хабардор қилиши керак.
