Садир Жапаров. president.kg сайти фотосурати
Қирғизистон президенти Садир Жапаров Европа Иттифоқига мамлакатда муҳим хомашёни ўзлаштиришда ҳамкорликни йўлга қўйишни таклиф қилди. Бу ҳақда республика раҳбари матбуот хизмати хабар берди.
Жапаров Самарқандда бўлиб ўтаётган «Марказий Осиё – Европа Иттифоқи» саммитидаги нутқида муҳим хомашёни ўзлаштириш ҳамкорликнинг истиқболли йўналиши бўлиб кўринишини таъкидлади.
«Қирғизистонда нодир ва қимматбаҳо металларнинг катта заҳиралари мавжуд. Биз бу йўналишдаги ҳамкорликни фаоллаштиришни таклиф қиламиз, уни Европа Иттифоқи ва айрим қўшниларимиз ўртасида амалга оширилган ишларга ўхшаш алоҳида шериклик ёки «йўл харитаси» форматида расмийлаштиришни таклиф қиламиз», — деди сиёсатчи
Қирғизистон президенти, шунингдек, сўнгги тўрт йилда Европа Иттифоқи мамлакатлари билан товар айирбошлаш ҳажми 2,4 баробар ошгани, бу бозорлар очиқлиги ва «Умум имтиёзлар тизими плюс» ташаббуси туфайли амалга оширилганини таъкидлади.
Жапаров Қирғизистоннинг стратегик жиҳатдан қулай географик ўрни ва ўсиб бораётган транзит салоҳияти савдо ва сармоя учун кенг истиқболларни очаётганини алоҳида таъкидлаб, Европа бизнес вакилларини лойиҳаларни ўзаро манфаатли асосда амалга оширишда фаол иштирок этишга чақирди.
Жумладан, республика раҳбари европаликларни гидроэнергетика соҳасидаги йирик лойиҳаларга, хусусан, Қозоғистон ва Ўзбекистон билан ҳамкорликда амалга оширилаётган Қамбар-Ота ГЭС-1 лойиҳасини амалга оширишга қўшилиш таклифини билдирди. Қирғизистон президенти, шунингдек, Европа Иттифоқи билан қайта тикланувчи энергия ва энергия тежамкор технологиялар соҳасида ҳамкорликни кенгайтиришдан манфаатдор эканини таъкидлади.
«Ўтган йил давомида 18 та кичик гидроэлектростанцияни ишга туширган бўлсак, жорий йили яна 15 та ана шундай иншоотни қурмоқдамиз. Бунга параллел равишда умумий қуввати 400 МВт дан ортиқ бўлган қуёш энергетикаси бўйича лойиҳаларни ишга туширдик. Глобал иқлим ўзгариши шароитида «яшил» иқтисодиётга ўтиш ва қайта тикланувчи энергия манбаларини ривожлантириш барқарор ривожланиш сари ягона йўлдир», — дея хулоса қилди Жапаров.
