Александр Марочкин. ҚФФ матбуот хизмати фотосурати
Қозоғистон терма жамоаси ва «Астана» ҳимоячиси Александр Марочкин терма жамоадаги фаолиятини якунлаганини эълон қилди. Футболчи бу ҳақда жаҳон чемпионати саралаш босқичи доирасидаги Қозоғистон – Лихтенштейн учрашувидаги ғалаба голини урганидан сўнг маълум қилди.
«Мен терма жамоадаги фаолиятимни якунлашга қарор қилдим. Ёшларнинг ўйнаш вақти келди — Қосим Жумахонов ва бошқа йигитлар катта бўлди. Шунинг учун биз уларга имконият беришимиз керак деб ўйлайман — энди улар бунга лойиқ эканликларини исботлашлари керак. Терма жамоа либосини кийиб, ўз ватанимни ҳимоя қилиш мен учун катта шараф эди. Биз ҳар доим мухлисларни хурсанд қилишга ҳаракат қилдик, албатта, барча ўйинлар кўнгилдагидек бўлмади. Баъзида кучли рақибларга ютқазиб қўйдик ва бу мухлисларимизга ёқмас эди. Лекин биз ҳеч қачон таслим бўлмасдан, охиригача курашдик», — деди Марочкин Қозоғистон футбол федерацияси матбуот хизматига.
34 ёшли футболчи терма жамоа мухлислари ва журналистлари, шунингдек, ҳамкорлари, мураббийлари ва ходимларига қўллаб-қувватлагани ва танқидлари учун миннатдорчилик билдирди.
«Миллий терма жамоада ўйнаш ҳар бир футболчи учун катта шарафдир. Футболга қизиққан ҳар бир бола бир кун келиб ўз мамлакатининг футболкасини кийишни орзу қилади», — деб таъкидлади Марочкин.
Александр Марочкин Қозоғистон терма жамоаси сафида 50 та ўйин ўтказган. Қозоғистонликлар 2:0 ҳисобида ғалаба қозонган Лихтенштейнга қарши жаҳон чемпионати саралашининг 2-тур учрашувида ҳимоячи терма жамоа сафидаги илк ва ягона голини киритди.
Александр Марочкин — ноёб футболчи. У футбол бўйича таълим олмаган. 22 ёшига қадар у ҳаваскорлар даражасида ўйнаган ва қўриқчи бўлиб ишлаган. У ўзининг биринчи профессионал шартномасини иккинчи дивизион клуби «Или-Саулет» билан имзолаган ва шу заҳотиёқ турнирда ғалаба қозонган, аммо жамоа бир тоифага кўтарилишни рад этган ва кейин клуб умуман фаолиятини тўхтатган. Марочкин аввалига «Каспий»га, кейин «Окжетпес»га, 2016 йили эса «Қайсар»га кўчиб ўтган ва шу ерда терма жамоага илк чақирувни олган. Бироқ, у миллий жамоадаги дебютини фақат 2019 йили, яъни «Тобол»га ўтганида ўтказган. Александр «Астана» билан 2023 йили шартнома имзолаган. У чемпион бўлган, Суперкубок ва Лига кубоги соҳибига айланган, шунингдек, икки марта Қозоғистон кубогини қўлга киритган.
