Алишер Никимбаев. Экспертнинг ижтимоий тармоқдаги фотосурати
Ўзбекистонлик менежер ва футбол эксперти Алишер Никимбаев клублар ўртасидаги жаҳон чемпионатида ФИФА ўйинлари директори сифатида иштирок этади. Бу ҳақда мутахассис ўзининг Телеграм-каналида ёзди.
Никимбаев айни дамда ёзда клублар ўртасидаги жаҳон чемпионатининг учта ўйинига мезбонлик қиладиган Вашингтондаги Audi Field стадионини кўздан кечирмоқда.
«Ушбу учта ўйинда ФИФА ўйинлари директори сифатида ишлашимга тўғри келади», — дейди Никимбаев.
Мутахассис 10 июнь куни бўлиб ўтадиган ЖЧ-2026 3-саралаш босқичининг Ўзбекистон миллий терма жамоаси иштирокидаги сўнгги ўйинини океан ортидан кузатишига тўғри келишини ёзган.
Никимбаев биринчилардан бўлиб клублар ўртасидаги жаҳон чемпионатининг бош кубоги суратини эълон қилди.
Қайд этиш лозим, Алишер Никимбаев йирик халқаро турнирларни ташкил этиш ишларида катта тажрибага эга. Жумладан, мутахассис 2022 йили Қатарда бўлиб ўтган жаҳон чемпионати, Осиё кубоги, футзал бўйича Ўзбекистонда ўтказилган жаҳон чемпионатида ишлаган.
15 июндан 13 июлга қадар АҚШда клублар ўртасидаги жаҳон чемпионати бўлиб ўтади. Турнирда олти қитъадан 32 та жамоа иштирок этади.
