depositphotos.com сайти фотосурати
Қозоғистон президенти Қосим-Жомарт Тўқаев давлат бошқаруви тизимини такомиллаштириш чора-тадбирлари тўғрисидаги фармонни имзолади, унга кўра мамлакатда Атом энергияси агентлиги ташкил этилади, деб хабар берди давлат раҳбари матбуот хизмати.
Агентлик президентга ҳисобот беради ва Энергетика вазирлигининг уран қазиб олиш, атом энергиясидан фойдаланиш ва радиациявий хавфсизликни таъминлаш, шу жумладан ёпиқ Семипалатинск полигони ҳудудида баъзи функцияларини ўз зиммасига олади.
Тўқаев шу кунгача Қозоғистон Энергетика вазири лавозимида ишлаб келган Алмасадам Саткалиевни агентлик раҳбари этиб тайинлади.
Президент куни кеча бўлиб ўтган Миллий Қурултойдаги нутқида Ядро энергетикаси агентлиги яқинда ташкил этилиши ҳақида гапирганди. Шу билан бирга, давлат раҳбари Қозоғистонда учта атом электр станциясини қуриш зарурлигини маълум қилган. Ҳозирча республика ўзининг биринчи атом электр станциясини қуришга тайёргарлик кўрмоқда. Унинг Балхаш кўли қирғоғида Олмаота вилоятининг Улкен қишлоғида қурилиши режалаштирилган.
Хабар берилганидек, қурилишни халқаро консорциум амалга оширади, аммо кимлар таркибига кириши ҳозирча номаълум. Потенциал технология етказиб берувчилар рўйхатига тўртта компания киритилган: Хитойнинг CNNC, Кореянинг KHNP, Россиянинг Росатом ва Франциянинг EDF компанияси. Консорциум иштирокчилари бўйича қарор 1 июлгача қабул қилиниши кутилмоқда.
