Тошкентда кечаю-кундуз ишлайдиган кафе. Андрей Кудряшов фотосурати / «Фарғона»
2025 йили Ўзбекистон ҳукумати хизмат кўрсатиш соҳасидаги 652 та драйвер лойиҳа инфратузилмасини таъминлаш учун 1 триллион сўм (тахминан 77 миллион доллар) ажратади. Бу норма мамлакат президенти Шавкат Мирзиёевнинг 27 февралдаги фармони билан мустаҳкамланган, деб хабар беради Адлия вазирлиги ўзининг Telegram-каналида.
Жумладан, қўллаб-қувватлаш чоралари умумий овқатланиш ва туризм корхоналарини ҳам қамраб олади. Шундай қилиб, 364 та йўл бўйи ва бошқа хизмат кўрсатиш объектлари, 154 та гастрономик кўчалари туну-кун ишлаётган савдо-кўнгилочар мажмуалари, шунингдек, 72 та қирғоқбўйи курорт зоналари ва 62 та истироҳат боғлари давлат томонидан кўмак олади.
Бундан ташқари, бюджетдан тадбиркорларга банк кредити шаклида бериладиган маблағлар ажратилди. Таъкидланишича, хизмат кўрсатиш соҳасини ривожлантиришга 67,4 триллион сўм (5,2 миллиард доллар), хизмат кўрсатиш объектларини ташкил этиш учун кўп қаватли уйлардаги нотураржой биноларини ижарага беришга 4,5 триллион сўм (346 миллион доллар) йўналтирилган.
Аҳолига турли хизматлар кўрсатувчи тадбиркорлар учун 1 фоизлик ижтимоий солиқ ставкасининг амал қилиш муддати 2028 йил 1 январга қадар узайтирилди.
Президент қарорида соҳанинг жорий йилдаги прогноз кўрсаткичлари белгилаб берилган:
👉 хизматлар ҳажмини 15% га ошириш;
👉 тармоқда 3 миллион кишига иш ўринлари яратиш;
👉 52 мингдан ортиқ янги хизмат кўрсатиш соҳаси объектларини яратиш.
Шу билан бирга, якка тартибдаги тадбиркорлар учун фаолият турлари ҳам кенгайтирилди. Улар енгил автомашиналарда йўловчиларни шаҳар, шаҳар атрофи ва шаҳарлараро ташишни амалга ошириш ҳуқуқига эга. Аммо бунинг учун фуқаролар тегишли лицензия олишлари керак бўлади. Қўшимча қилиш лозим, якка тартибдаги тадбиркорлар илгари ҳам такси ҳайдовчиси бўлиб ишлаши мумкин эди, бироқ жорий йил бошига қадар.
Яна бир янгилик солиқларга тегишли. 2025 йил 1 апрелдан бошлаб тадбиркорлик субъектлари томонидан ҳуқуқбузарликларни аниқлаш бўйича чоралар кўриш тартиби кучга киради. Биринчидан, фискал органлар тадбиркорларга огоҳлантириш беради. Агар уч кун ичида камчиликлар тузатилмаса, солиқ текшируви тайинланади. Бундан ташқари, низомга кўра, текширув бу ҳақдаги маълумотлар Ягона давлат назорати тизимига жойлаштирилган ва бизнес-омбудсманга хабар берилгандан кейингина амалга оширилади.
