Шаҳбоз Шариф ва Шавкат Мирзиёев. Ўзбекистон президенти матбуот хизмати фотосурати
Ўзбекистон Президенти Шавкат Мирзиёев ва Покистон Бош вазири Шаҳбоз Шариф қўшма транспорт-логистика компаниясини ташкил этиш тўғрисида келишиб олдилар, унинг мақсади, жумладан, транзит юк айланмасини оширишдан иборат бўлади. Икки давлат раҳбарларининг Тошкентда бўлиб ўтган учрашувида шу ҳақда сўз борди, деб хабар беради Марказий Осиё республикаси раҳбари матбуот хизмати.
Кейинги бир неча йилда «Ўзбекистон – Афғонистон – Покистон» мултимодал йўлаги орқали юк ташиш ҳажми 5 баробар кўпайгани мамнуният билан қайд этилди. Юк айланмаси ҳажмини янада ошириш мақсадида қўшма транспорт-логистика компаниясини ташкил этишга келишиб олинди. Томонлар, шунингдек, Трансафғон темир йўли лойиҳасини илгари суриш бўйича саъй-ҳаракатларни мувофиқлаштириш муҳимлигини таъкидладилар.
Мирзиёев ва Шариф икки давлат ўртасидаги стратегик шерикликни мустаҳкамлашга доир қатор масалаларни муҳокама қилди. Расмий маълумотларга кўра, ўтган йили Ўзбекистон ва Покистон ўртасидаги товар айирбошлаш ҳажми 400 миллион доллардан ошган, қўшма корхоналар сони 130 тага етган. Тошкент ва Карачида савдо уйлари очилди, Ўзбекистон пойтахти билан Лаҳор ўртасида тўғридан-тўғри авиақатновлар тикланди.
Аммо ҳамкорлик улкан салоҳиятга эга . Давлат раҳбарлари ўзаро савдо ҳажмини 2 миллиард долларга етказиш мумкин бўлган «йўл харитаси»ни тасдиқладилар, унга кўра, имтиёзли савдо тўғрисидаги битим доирасида товарлар рўйхатини кенгайтириш, фитосанитария ва карантин талабларини, божхона тартиб-таомилларини ўзаро соддалаштириш, стандартларни яқинлаштириш, электрон савдо платформаларини интеграция қилиш, харидларда иштирок этиш имкониятини таъминлаш, банклараро ҳисоб-китоблар механизмларини такомиллаштириш ва бошқалар устувор вазифалар сифатида белгиланди.
Етакчи компанияларнинг фармацевтика, электротехника, қишлоқ хўжалиги машинасозлиги, геология ва минерал ресурслар, тўқимачилик, чарм саноати ва бошқа тармоқларда кооперация лойиҳаларини амалга ошириш режалари кўриб чиқилди. Сиёсатчилар маданий-гуманитар ҳамкорликни кенгайтириш тарафдори эканини таъкидладилар, шу муносабат билан ўзаро маданият ҳафталиклари ва сайёҳлик дастурлари тақдимотларини ўтказиш бўйича келишувга эришилди.
Мирзиёев Ўзбекистонда икки давлат минтақалари форумини ўтказишни таклиф қилди, давлат раҳбарлари Ҳукуматлараро комиссиянинг навбатдаги йиғилиши жорий йил июль ойида Лаҳор шаҳрида ўтказилишини ҳам тасдиқладилар.
Учрашув якунлари бўйича Мирзиёев ва Шариф кўп қиррали Ўзбекистон-Покистон ҳамкорлигини янада ривожлантириш ва мустаҳкамлашга қаратилган Қўшма декларация ҳамда икки томонлама Олий даражадаги стратегик шериклик кенгашини тузиш тўғрисидаги баённомани имзоладилар.
Бундан ташқари, бир қатор бошқа ҳужжатлар тасдиқланди:
✔️ Фан, технология ва инновациялар соҳасида ҳамкорлик тўғрисидаги битим;
✔️ Дипломатик паспорт эгаларининг визасиз сафарлари тўғрисида битим;
✔️ Ички ишлар вазирликлари ўртасидаги ҳамкорлик тўғрисида битим;
✔️ Профессионал таълим соҳасидаги ҳамкорлик тўғрисида битим;
✔️ Ёшларга оид сиёсат соҳасидаги ҳамкорлик тўғрисида битим;
✔️ Миллий ахборот агентликлари ўртасидаги ҳамкорлик тўғрисида битим;
✔️ Дипломатик академиялар, Тошкент ва Лаҳор шаҳарлари ўртасида ҳамкорлик бўйича битимлар ва аҳдлашувлар.
