Бекназ Алмазбеков. "Рух" ФК матбуот хизмати фотосурати
Қирғизистон терма жамоаси ҳужумчиси Бекназ Алмазбеков фаолиятини Львовнинг «Рух» клубида давом эттиради.
«Фарғона» хабарига кўра, 19 ёшли футболчи билан шартнома бир ярим йилга мўлжалланган.
Бекназ XXI Украина Премьер-лигасида ўйнаган биринчи қирғизистонлик бўлади. Аввалроқ Қирғизистон терма жамоаси аъзоси Ахлиддин Исроилов Киевнинг «Динамо» ёшлар клуби ва «Черкасский Днепр» жамоаларида ўйнаган бўлса-да, олий лигада дебют ўтказмаганди. 1990-йиллари Украина Премьер-лигасида беш нафар қирғизистонлик ўйнаган: Тагир Фасахов, Виталий Кобзар, Олег Казмирчук, Александр Корзанов ва Александр Агарин.
Алмазбеков шу йилнинг январь ойида клубда текширувдан ўтганди. Ўртоқлик учрашувида голли узатмани амалга ошириб, яхши таассурот қолдирди. Февраль ойида футболчи Косованинг «Лапи» клуби билан шартномасини бекор қилгани малум бўлган ва ёшлар ўртасидаги Осиё кубогидан сўнг Бекназ катта эҳтимол билан «Рух»га ўтишини айтганди.
Эслатиб ўтамиз, асли тожикистонлик 16 ёшли Муҳаммад Жўрабоев «Рух» жамоасида тўп суради. Донецкнинг «Шахтёр» клуби ҳам Тожикистон терма жамоаси ярим ҳимоячиси Хусрав Тоировни Одессанинг «Чорноморец» клубига ижарага берган.
Бекназ Алмазбеков — Бишкекнинг «Алга» клубида тарбия топган ва «Галатасарай» академиясини тамомлаган. У 2017 йилдан 2024 йилгача турк клуби тизимида бўлган. 2020 йили Алмазбеков Осиёнинг энг яхши футболчилари рўйхатига киритилган. Шунингдек, у «Галатасарай» ўсмирлар ўртасидаги ўйинлардан бирида рақиб дарвозасига пенальти тепишдан бош тортгани, чунки у ҳакам хато қилганига ишонгани билан ҳам танилган. У ҳеч қачон расмий ўйинларда асосий жамоада дебют ўтказмаган. 2024 йил кузида у Косовонинг «Лапи» клубига ўтган, бироқ бир неча ой ўтиб жамоани тарк этган. Қирғизистон терма жамоаси сафида 13 та ўйин ўтказган. Ёшлар жамоаси футболчиси.
