bcs-express.ru сайти фотосурати
24 февраль куни Европа Иттифоқи ва Буюк Британия Россияга қарши санкциялар кенгайтирилганини эълон қилди. Янгиланган рўйхатга Марказий Осиё компаниялари ҳам киритилган.
Буюк Британия ҳукумати маълумотларида таъкидланишича, чекловлар жорий этилган жисмоний ва юридик шахсларнинг жамланган рўйхатига 70 га яқин банд қўшилган.
Компаниялар орасидаги «янгилар»дан иккитаси Қирғизистонда жойлашган. Шундай қилиб, «Керемет банк» «Россияни қўллаб-қувватловчи хорижий молия институти» мақоми билан реестрга киритилган. Британия расмийларига кўра, Бишкек банки РФ ҳукумати учун стратегик бўлган молия соҳасида россиялик ҳамкорларга хизмат кўрсатади.
Кредит муассасасидан ташқари, республика пойтахтида юридик манзилга эга Rama Group компанияси ҳам санкцияга дучор бўлган. У Россияга микроэлектроника билан боғлиқ технологиялар ва товарларни етказиб беришда гумон қилинган.
Европа Иттифоқи ташқи ишлар кенгаши Россияга қарши санкцияларнинг 16-пакетини маъқуллангани ҳақида пресс-релиз эълон қилди. Янги рўйхат 83 та банддан иборат, шунингдек унга 48 та жисмоний шахс ва 53 та ташкилот киритилган.
Қайд этилишича, компаниялар рўйхатига нафақат Россия корхоналари, балки хорижий тузилмалар – Хитой, Ҳиндистон, Сингапур, БАА, Туркия, Қозоғистон ва Ўзбекистон резидентлари ҳам киритилган. Жумладан, гап Олмаотадаги MetallStan ва Kazstanex фирмалари, шунингдек, Тошкентдаги Uzstanex МЧЖ ҳақида бормоқда.
Мазкур компанияларнинг Европа Иттифоқи санкциялар рўйхатига киритилиши сабабларига доир батафсил маълумот йўқ, аммо Европа ташкилоти пресс-релизида янгиланган рўйхатга киритилган компаниялар савдо чекловларини четлаб ўтиш ёки Россия ҳарбий-саноат комплекси эҳтиёжлари учун товарлар, масалан, дронлар ва ракеталар ишлаб чиқариш учун бутловчи қисмларни етказиб бериш билан шуғуллангани таъкидланади.
Эслатиб ўтамиз, Европа Иттифоқи томонидан чекловлар қўйилган юридик шахсларнинг тўлиқ реестрига Марказий Осиёнинг бошқа вакиллари ҳам киритилган. Ўтган йил февраль ва июнь ойларида Қозоғистоннинг Elem Group ва Da Group 22 компаниялари рўйхатга қўшилган эди. Ўша йилнинг ёзида рўйхатдан Қирғизистоннинг Muller Markt ва Profflab компаниялари жой олди. Ўзбекистонда рўйхатдан ўтган Alfa Beta Creative, GFK Logistics Asia ва Mvizion компанияларига келсак, улар 2023 йили қора рўйхатга киритилган эди.
