press.kz сайти фотосурати
Шахтинск суди (Қарағанда вилоятидаги шаҳар) 2023 йил августида юз берган ёнғинда беш нафар кончи ҳалок бўлган «Казахстанская» конининг тўрт нафар бошқарувчисини тўрт йиллик қамоқ жазосига ҳукм қилди, дея хабар берди КазТАГ.
Айбланувчилар курсисида «Казахстанская» ишлаб чиқариш бўйича директор ўринбосари вазифасини бажарувчи шахс, кон конвеер транспорти участкаси бошлиғи, унинг ўринбосари ва кон конвеер транспорти участкаси механиги ўринбосари вазифасини бажарувчиси бўлган.
Улар кончилик ва қурилиш ишларини олиб боришда хавфсизлик қоидаларини бузганликда, эҳтиётсизлик оқибатида икки ёки ундан ортиқ кишининг ўлимига сабаб бўлганликда айбдор деб топилган. Маҳкумлар жазони минимал режимли колонияларда ўтайди. Шунингдек, суд уларга уч йил давомида кончилик соҳасида раҳбарлик лавозимларида ишлашни тақиқлади.
Суд оилаларнинг маънавий зарарни қоплаш тўғрисидаги даъвосини рад этган.
Айбланувчиларнинг адвокатлари уларни «деярли айбдор деб топишганларини» айтиб, оқлов ҳукмини талаб қилишган.
Ўша пайтлар «АрcелорМиттал Темиртау»га тегишли бўлган «Казахстанская» конида ёнғин 2023 йил 17 август куни эрталаб содир бўлганди — конвеер ёниб кетган. Конда 227 киши бўлган, улардан 222 нафари ер юзасига чиқарилган. Беш нафар кончи ҳалок бўлган, яна 13 киши жароҳат олган.
Бир неча ой ўтгач, 2023 йил ноябрь ойида худди шу компаниянинг бошқа бир корхонаси — Қарағандадаги Костенко конида метан портлаши содир бўлган. Натижада 46 нафар кончи ҳалок бўлган.
Шундан сўнг президент Қосим-Жомарт Тўқаев хорижий инвестор билан ҳамкорликни тўхтатишни буюрган ва «АрcелорМиттал Темиртау» қозоғистонлик тадбиркор Андрей Лаврентьевга ўтказилган. Кейинчалик компания ўзининг тарихий номи — Qarmetга қайтган.
