sud.uz сайти фотосурати
Фарғона вилояти Қўштепа тумани суди Ўзбекистон фуқароси А.Х.ни бошқа давлат — Россия томонида ҳарбий ҳаракатларда қатнашгани учун беш йилга озодликдан маҳрум қилди. Ҳукм 4 ноябрь куни эълон қилинди, деб ёзади UzNews.uz.
Жиноят иши материалларида айтилишича, айбланувчи 2023 йил май ойида Россияга ишлагани кетган. Дастлаб у меҳнат фаолияти билан шуғулланган, аммо ноябрь ойида «моддий манфаат йўлида» Россия Федерацияси Мудофаа вазирлиги билан бир йил муддатга шартнома тузган ва Қуролли Кучлар сафига қўшилган.
Ўзбекистон фуқароси Россия-Финляндия чегараси яқинида жойлашган базада ўқув машғулотларидан ўтган, у ерда қуролдан фойдаланиш ва жанговар ҳаракатлар асосларини ўргатган. Жорий йил январь ойида ўзбекистонлик ҳарбий машғулотларни давом эттириш учун Белгород вилоятидаги полигонга жўнатилган.
Орадан бир ой ўтиб, тайёргарликни тугагач, А.Х. Украинага борган ва у ерда жангларда қатнашган. Аммо у тез орада дрон ёрдамида ташланган снаряд портлаши оқибатида жиддий жароҳат олган. Ўзбекистонлик боши, қўли ва оёғидан жароҳат олган.
Ёлланма аскар Москва вилоятидаги ҳарбий госпиталга ётқизилган ва у ерда бир ойга яқин бўлган. Кейин июнь ойида мигрант уйига қайтади ва жиноий ишида айбланувчига айланади. Шу билан бирга, мазкур шахс Россия Мудофаа вазирлигидан бирон-бир тўлов олган-олмаганига аниқлик киритилмаган.
Суд жараёнида айбланувчи айбига иқрор бўлган ва тавба қилган. Мазкур ҳолат ва фуқаронинг тергов билан фаол ҳамкорлик қилгани инобатга олиниб, унга ёлланиш (Жиноят кодексининг 154-моддаси 1-қисми) моддасида назарда тутилган энг кам муддат — беш йил озодликдан маҳрум қилиш жазоси тайинланди. А.Ҳ. жазони умумий режимли колонияда ўтайди.
Шунга ўхшаш ҳолатлар аввал ҳам қайд этилган. Шундай қилиб, 2024 йил июль ойида Қорақалпоғистон суди маҳаллий фуқарони ёлланма жинояти учун уч йилга озодликдан маҳрум қилиш жазосига ҳукм қилганди. Аниқлик киритилишича, мигрант Россия армиясида тайёргарликдан ўтган бўлса-да, жанговар ҳудудга жўнатилгунча қадар ватанига қочиб кетган.
Шу йилнинг октабрь ойида яна бир Ўзбекистон фуқароси Россия-Украина можаросида иштирок этгани учун уч йилга озодликдан маҳрум этилганди. Суд жараёнида у Россия фуқаролигини олиш учун РФ Қуролли кучлари сафига қўшилишга қарор қилганини айтган.
