yuz.uz сайти фотосурати
Ozbekiston Temir Yollari акциядорлик жамияти 2020 йили коронавирус пандемияси туфайли тўхтатилган «Тошкент-Москва-Тошкент» йўналишида 24 сентябрдан бошлаб поездлар қатновини тиклайди. Жадвал операторнинг Телеграм-каналида эълон қилинди.
Ўзбекистон ва Россия пойтахтлари ўртасидаги алоқа тикланганидан сўнг биринчи поезд Тошкент шимолий вокзалидан 24 сентябрь (сешанба) куни маҳаллий вақт билан соат 19:55 да жўнайди. Келгусида қатновлар ҳафтанинг турли кунларида амалга оширилади: масалан, октябрь ойида 2 (чоршанба), 10 (пайшанба) ва 26 (шанба) кунлари.
Поездлар 28 сентябрдан қарама-қарши йўналишда ҳаракатлана бошлайди. Улар, шунингдек, ҳафтанинг турли кунларида юрадилар, лекин ҳар доим бир вақтнинг ўзида – соат 5:40 да.
Жадвалга кўра, жорий йил охиригача Тошкентдан Москвага тўққизта ва Россия Федерацияси пойтахтидан Ўзбекистонга саккизта поезд жўнатиш режалаштирилган.
«Ўзбекистон темир йўллари» сайти орқали чипталарни харид қилиш мумкин. Шундай қилиб, 24 сентябрда жўнайдиган поезд учун қуйидаги нархлар белгиланган:
🚂 плацкарт — 2 616 770 сўм ($206);
🚂 купе — 3 574 240 сўм ($282).
Компания йўловчиларга олдиндан сотиб олинадиган чипталарга чегирма таклиф қилади. Поезд жўнашидан 41-45 кун олдин сотиб олинган чипта асосий нархнинг 35% миқдоридаги энг катта чегирмага эга бўлади.
Машҳур Tutu.ru агрегаторида Тошкент-Москва поездларига чипталар сотуви ҳам йўлга қўйилганини қўшимча қиламиз. Бу ерда нархлар рус рублида кўрсатилган. Шунингдек, поезд йўлда тахминан уч куну беш соат вақт сарфлаши таъкидланган.
