orda.kz сайти фотосурати
Қарағандадаги YDD Corporationнинг ферроқотишма заводи ишчилари ёнғин бошланганда қутқарувчиларни ичкарига киритишга рухсат бермаган. Бу ҳақда Фавқулодда вазиятлар вазири ўринбосари Бауиржон Сиздиқов маълум қилди, дея хабар беради InformБЮРО.
«Ҳодиса соат 4:00 атрофида содир бўлган, бироқ биз икки соатдан кейин соат 6:00 атрофида маълумот олдик. Бу фуқаролик мудофааси қоидаларига зиддир. Тез орада қутқарувчиларимиз етиб келишди, лекин уларни ичкарига киритишмади. Уларнинг ичкарига киритмасликка ҳаққи йўқ. Шунинг учун маъмурий иш очилди», — деди Сиздиқов ҳукумат йиғилишида.
ORDA.kz хабар беришича, қоида тариқасида, бундай заводларнинг ўз қутқарув бўлинмалари бўлиши керак. Фожиа юз берган куни ФВВ ходимларига уларнинг ёрдами талаб қилинмаслиги тушунтирилган. Бироқ, уларни корхонага киритмаслик қонунбузарлик бўлиб, Қозоғистон Республикасининг Маъмурий жавобгарлик тўғрисидаги кодексига мувофиқ, 200 ойлик тўлов миқдорида (738,4 минг тенге/1,5 минг доллар) жарима солинади.
YDD Corporation заводига қарашли 1-сонли завод печида 20 июлга ўтар кечаси ёнғин чиққан. Оқибатда саккиз нафар ишчи оғир тан жароҳати олган. Кейинчалик 31 ёшли ўчоқ бошлиғи Музафар Исмоилов касалхонада вафот этган. Орадан икки кун ўтиб танасининг 90 фоизи куйган 25 ёшли технолог Ерулан Казкен оламдан ўтган. 25 июль куни механиклар Дмитро Адамчук ва Толеген Жетписбаевнинг ўлгани маълум бўлди.
Воқеа юзасидан ҚР Жиноят кодексининг 156-моддаси 2-қисми «Меҳнат хавфсизлиги қоидаларини бузиш, эҳтиётсизлик оқибатида соғликка оғир шикаст етказиш» билан жиноят иши қўзғатилган.
YDD Corporationнинг ферроқотишма заводи Қарағандада жойлашган. Йилига 240 минг тоннага яқин ферросилиция ишлаб чиқаради. «YDD Corporation» МЧЖ таъсисчиси компаниянинг ҳаммуаллифи, собиқ парламент депутати Эрлан Ниғматулин ҳисобланади. 2021 йили у Forbes Kazakhstan нашрига кўра Қозоғистоннинг энг нуфузли 50 нафар бизнесменлари рейтингига киритилган.
