akchabar.kg сайти фотосурати
2024 йил 1 сентябрдан Қирғизистонда шифокорлар ва бошқа тиббиёт ходимларининг маошлари оширилади. Бу ҳақда республика президенти Садир Жапаров фармонида сўз юритилади, деб хабар беради унинг матбуот хизмати.
Куздан бошлаб иш ҳақи қуйидаги нисбатда ошади:
👉 шифокорлар учун — 50% га;
👉 ҳамширалар учун — 20% га;
👉 кичик хизмат ходимлари ва тез тиббий ёрдам ҳайдовчилари учун — 10% га.
Бундан ташқари, давлат раҳбари жорий йил 1 июлидан бошлаб мамлакатнинг чекка ҳудудларида ишлашга қарор қилган ёш мутахассисларга ойлик маошидан ташқари 20 минг сўм (230 АҚШ доллари) миқдорида стипендия ҳам берилишини алоҳида таъкидлади.
Жапаров барча янги қоидалар кучга киргандан сўнг вилоят шифокорларининг маоши қандай ошишини мисол қилиб келтирди:
✅ жарроҳники — 20,1 минг (232 доллар) дан 50,2 минг сўмгача (580 доллар);
✅ анестезиолог ва реаниматологники — 35,5 минг (410 доллар) дан 73,2 минг сўмгача (847 доллар);
✅ педиатрники — 32,5 минг (375 доллар) дан 68,7 минг сўмгача (795 доллар).
Қирғизистон Соғлиқни сақлаш вазири Алимқодир Бейшеналиев қўшимча тўловларни кичик шаҳарлар ва қишлоқ жойларга ишлаш учун борадиган зарур мутахассисликлар, масалан, педиатр ва жарроҳлар олишини қўшимча қилди. Янги қоидалар фақат Бишкек ва Ўшлик шифокорларга тааллуқли бўлмайди.
Расмийнинг сўзларига кўра, тегишли компенсация учун мамлакат бюджетидан қарийб 381 миллион сўм (4,4 миллион доллар) ажратилган. Жами 761,8 миллион сўм (8,8 миллион доллар) шифокорларнинг йил давомида иш ҳақи учун қўшимча харажатларга сарфланади.
Бейшеналиевнинг таъкидлашича, республикада бошқа мамлакатларга нисбатан ҳар ўн минг аҳолига 17,5 фоиз тиббиёт ходимлари тўғри келади. Шу муносабат билан уларнинг маошини ошириш зарурати пайдо бўлган.
Президент Жапаров кўрилаётган чора-тадбирларни шифокорлар учун қулай шарт-шароит яратиш бўйича давлат томонидан амалга оширилаётган кенг кўламли ишлардан бири, деб таъкидлади. Бундан ташқари, унинг сўзларига кўра, ўзгаришлар бутун Қирғизистон бўйлаб тиббий хизматлар сифатини оширишга қаратилган.
Давлат раҳбари матбуот хизмати, шунингдек, республика раҳбари энг кам пенсияларни икки босқида ошириш тўғрисидаги фармонни имзолаганини ёзади.
10 июлдан унинг ҳажми 3500 сўмни (40 доллар) ташкил этади, 10 октабрдан эса 6900 сўмга (тахминан 80 доллар) ошади.
Шу тариқа Қирғизистонда яшаш минимумидан паст пенсия олувчилар қолмайди.
«Бу осон бўлмади, лекин охирги йилларда коррупциянинг барча кўринишларига қарши фаол ва муросасиз кураш олиб борилаётгани туфайли биз бунга эришолдик. Амалга оширилаётган ислоҳотлар мамлакат иқтисодиётининг ўсишини таъминлаш имконини берди», — деди Садир Жапаров.
