Қайрат Боранбаев. nternetelite.org сайти фотосурати
Қозоғистонлик олигарх, биринчи президент Нурсултон Назарбоевнинг собиқ қудаси Қайрат Боранбаев ҚП Миллий паралимпия қўмитаси президенти этиб қайта сайланди. Унинг номзоди Паралимпия федерациялари вакилларининг қарори билан бир овоздан маъқулланди. Бу ҳақда бизнесменнинг ўзи Instagramдаги (РФда экстремистик деб тан олинган Meta копрациясига тегишли тармоқ) саҳифасида маълум қилди.
Боранбаев бу ўзи учун жуда муҳим лавозим эканини таъкидлайди. «Биз Қозоғистонда Паралимпия ҳаракатини ривожлантириш бўйича кенг кўламли стратегиямизни амалга ошириш жараёнидамиз. Сўнгги йилларда эришган барча ютуқларимизга қарамай, бизда кўплаб режалар бор, бунинг натижасида Қозоғистон пара-спортчиларни профессионал тарзда тайёрлашни биладиган, уларга алоҳида эътибор берадиган, шунингдек, ногиронларни қўллаб-қувватлашда одамларга кўмак берадиган мамлакат сифатида ўз обрўсини мустаҳкамлашда давом этади», — деди у.
Шунингдек, бизнесмен келажакдаги мақсадларни, жумладан Париждаги Паралимпия ўйинларига тайёргарликни ҳам айтиб ўтди. Бундан ташқари, йил охиригача қўмита ёзги спорт турлари бўйича машғулотлар имкониятларини кенгайтириш учун Остонада янги ўқув маркази қурилишини бошлайди. «Қишки параспорт турларини ривожлантириш учун шарт-шароитларни яхшилаш мақсадида «Тарлан» инклюзив муз майдонини реконструкция қилишни режалаштирмоқдамиз», – деди Боранбаев.
У паралимпия спортининг самарали тизимини яратиш ва Қозоғистоннинг минтақадаги спорт етакчилигини кучайтириш истагини таъкидлади.
Боранбаев 2015 йилдан буён Миллий паралимпия қўмитасини бошқариб келган. Илгари у Қозоғистоннинг энг бой ва нуфузли 50 нафар бизнесменлари қаторидан жой олган. Унинг қизи 2020 йил август ойида вафот этган собиқ президент Нурсултон Назарбоевнинг набираси Ойсултонга турмушга чиққанди.
2022 йил 17 мартида, январдаги тартибсизликлардан кўп ўтмай, Боранбаев ҳибсга олинган. У квазидавлат секторида, жумладан, газ билан боғлиқ операцияларни ўтказишда маблағларни ўғирлашда айбланган. Орадан бир йил ўтиб тадбиркор саккиз йиллик қамоқ жазосига ҳукм қилинган, бироқ кейинчалик газ нархи кўрсатилган ҳужжатнинг асл нусхаси йўқлиги сабаб, ҳукм бекор қилинган.
Жорий йилнинг август ойида Боранбаев ўз айбига иқрор бўлиб, тергов билан келишувга эришган, шундан сўнг у олти йиллик қамоқ жазосига ҳукм қилинган. Октябрь ойида Оқмола вилояти Зерендинский туман суди олигарх жазо муддатининг учдан бир қисмини ўтаганлиги, етказилган зарарни қоплагани ва қилмишидан пушаймон бўлгани сабабли унинг қамоқ жазосини озодликни чеклаш билан алмаштирди.
Жараён давомида тадбиркор умумий қиймати 90 миллиард тенгедан (195,4 миллион доллар) ортиқ бўлган мол-мулкини давлатга ўз ихтиёри билан қайтарди. Боранбаев компанияси Таълим инфратузилмасини қўллаб-қувватлаш жамғармасига яна 66 миллион доллар ўтказди. Ниҳоят, тадбиркор маблағларни ўғирлаш бўйича тергов доирасида 14,5 миллиард тенге (30,3 миллион доллар)ни қайтариб берди. Худди шу иш бўйича суд ҳукми билан унга тегишли Олмаотадаги ер участкаси ва 2 миллиард тенгедан (4 миллион доллар) ортиқ банк ҳисоб рақамлари мусодара қилинган.
