Магомед Адиев. kazfootball.kz сайти фотосурати
Қозоғистон футбол федерацияси (КФФ) матбуот хизмати терма жамоа бош мураббийи, россиялик мутахассис Магомед Адиев истеъфога чиққанини маълум қилди.
КФФ хабарига кўра, Адиев истеъфога чиқишига оилавий шароит сабаб бўлган.
«ҚФФ бундай ривожланишга тайёр эди ва келаси ҳафта бошида янги мураббийни танлайди», — дейилади хабарда.
Эслатиб ўтамиз, апрель ойи бошида Магомед Адиев Грознийнинг «Ахмат» клубини бошқариб, жамоани РПЛдан тушиб кетишдан сақлаб қолганди. У клуб ва терма жамоадаги лавозимларни бирлаштирган. Мутахассиснинг клуб билан шартномаси қисқа муддатли эди ва тез орада тугайди. Адиевнинг ўзи жамоа билан шартномани узайтириш ёки узайтирмаслигини билмаслигини, аммо Қозоғистон терма жамоаси билан ишлашга қайтишга тайёрлигини айтди. Адиев истеъфога чиқишидан бир кун аввал унинг келажаги аслида ҚФФ раҳбарияти ва «Ахмат» ўртасидаги музокараларда ҳал қилинаётганини таъкидлади. «Ҳар қандай натижа бўлиши мумкин», — деди Адиев.
Адиев Қозоғистон тарихидаги энг муваффақиятли мураббий ҳисобланади. Унинг қўл остида Қозоғистон терма жамоаси илк бор УEФА Миллатлар лигасида ғолиб чиқди, шунингдек, 2024 йилги Европа чемпионати саралашида ҳам ўзининг энг яхши натижаларини кўрсатди, бироқ жамоа турнирнинг ўзида иштирок эта олмади.
Магомед Адиев мураббийлик фаолиятини Нижний Новгородда бошлаган. У Нижний Новгороднинг «Волга» жамоасида мураббий ёрдамчиси ва ёшлар мураббийи сифатида ишлаган. Турли вақтларда Грознийнинг «Ахмат», Махачқалъанинг «Анжи», Песнокопскнинг «Чайка» клубларида ишлаган. 2021 йили у Қарағанданинг «Шахтёр» клубини, бир йилдан сўнг Европанинг энг заиф жамоаларидан бири ҳисобланган Қозоғистон терма жамоасини бошқарган.
