Имконияти чекланган одамлар учун кўтаргич. smartik.ru сайти фотосурати
Ўзбекистон Президенти Шавкат Мирзиёев тўсиқсиз туризм инфратузилмасини ривожлантириш бўйича қарорни имзолади, деб хабар беради «Газета.uz».
Ҳужжатда ногиронлиги бўлган шахсларнинг эркин ҳаракатланиши учун сайёҳлик обектларида шарт-шароит яратиш, барча фуқаролар учун тенг имкониятлар яратиш чора-тадбирлари белгилаб берилган.
Жумладан, жорий йили ногиронлиги бўлган шахсларнинг тўсиқсиз ҳаракатланиши учун маданий мерос объектларида уларга шикаст етказмаган ҳолда пандус, плантус ва лифтлар ҳамда кўзи ожизлар учун объектларнинг кичрайтирилган ўлчамдаги макетлари ўрнатилади. Улар тўғрисида Брайль алифбосида маълумотлар жойлаштирилади.
Темир йўл ва жамоат транспортларида ҳамда барча аэропорт, вокзал, автошоҳбекатларда ногиронлиги бўлган ва жисмоний имконияти чекланган шахслар учун шароитлар, махсус кўтарилиш пандуслари ва қулай зина тутқичлари ўрнатилади ҳамда кема аравачалари (ногиронлиги бўлган шахслар учун махсус аравача) қўйилади.
2027 йил 1 январга қадар Туризмни қўллаб-қувватлаш жамғармаси маблағлари ҳисобидан қуйидагилар қоплаб берилади:
👉 Қорақалпоғистон Республикаси, вилоятлар ва Тошкент шаҳрида I ва II гуруҳ ногиронлиги бўлган 1000 нафар шахсга Ўзбекистон бўйлаб саёҳат қилиш харажатларининг 50 фоизи, бироқ 500 минг сўмдан ошмаган қисми;
👉 эшитиш қобилиятини йўқотган ногиронлиги бўлган шахслар учун сурдогидлар тайёрлаш курслари харажатларининг 50 фоизи.
Меҳмонхона хизматлари кўрсатувчи тадбиркорлар 2024 йил 1 апрелдан 2026 йил 1 апрелгача Туризмни қўллаб-қувватлаш жамғармасига ўтказилган туристик (меҳмонхона) йиғимлари суммасидан чорак якунлари бўйича субсидия олади.
Шу билан бирга, камида учта хонаси ногиронлик аравачалари, дисплейлар ва эшитиш ва визуал идрок этиш учун овозли қурилмалар билан жиҳозланган меҳмонхона эгасига ҳар бир бундай хона учун 2 миллион сўм (175 АҚШ доллари) миқдорида субсидия берилади, бордию меҳмонхона юлдуз тоифасига эга бўлса, агар бўлмаса — 1 миллион (80 доллар).
Туризм қўмитасига Техник жиҳатдан тартибга солиш агентлиги билан биргаликда 1 апрелга қадар илғор хорижий тажрибани ўрганган ҳолда тўсиқсиз туризмни ривожлантириш стандартларини ишлаб чиқиш топширилди.
ℹ️ Бундан олдин Тошкент шаҳрида имконияти чекланган шахслар учун «Меҳрибон такси» хизмати йўлга қўйилгани ҳақида хабар берилган эди. Ўзбекистон пойтахти ҳокимлиги маълум қилишича, ҳар бир йўловчидан тушаётган даромаднинг маълум фоизи ногиронлиги бўлган шахсларни ижтимоий муҳофаза қилиш ташкилотлари ҳисоб рақамига ўтказилади.
