sport.kz сайти фотосурати
Қозоғистон собиқ президенти Нурсултон Назарбоевнинг куёви Тимур Кулибаев Kazenergy раҳбари лавозимини тарк этди, деб хабар беради Tengrinews.kz нашри.
Бу Қозоғистон нефть, газ ва энергетика сектори ташкилотлари уюшмаси бўлиб, Кулибаев 2005 йил ноябрь ойида ташкил этилганидан буён раҳбарлик қилиб келган. 8 декабрь куни Kazenergy сайтида «КазМунайГаз» раҳбари Мағзум Мирзагалиев унинг раислигига сайлангани ҳақида маълумот пайдо бўлди.
Қозоғистонлик миллиардер Тимур Кулибаев Назарбоевнинг ўртанча қизи Динарага уйланган. У Halyk Bankнинг асосий акциядори, мамлакатдаги иккинчи йирик бойликнинг эгаси. Кулибаев, шунингдек, кўп тармоқли «Кипрос» МЧЖга ва умумий майдони 950 минг квадрат метр бўлган тижорат кўчмас мулкини бошқарадиган «Mercury Properties» МЧЖ улушига эга.
2022 йил январь воқеаларидан кейин Кулибаев ҳам собиқ президент оиласининг кўплаб аъзолари сингари бир қатор лавозимларини йўқотди. Жумладан, саккиз йиллик раҳбарликдан сўнг у ўзи тузган – «Атамекен» миллий тадбиркорлар палатасини тарк этди, шунингдек, Россия «Газпром» директорлар кенгаши аъзолигидан истеъфога чиқди ва унинг таркибини тарк этди.
Шу билан бирга, Кулибаев Қозоғистон Миллий олимпия қўмитаси раҳбари лавозимини сақлаб қолди. Аммо «Азаттиқ» радиоси (Россияда хорижий агент сифатида тан олинган Озодлик радиосининг минтақавий хизмати) маълум қилишича, МОҚнинг ўзи спортга ажратилган давлат маблағларини тақсимлашдан четлаштирилган.
