"Айкол-2" миссияси репатриантлари. Қирғизистон ТИВ матбуот хизмати фотосурати
Қирғизистон ҳукумати Сурия шимоли-шарқидаги махсус лагерларда бўлган фуқароларини ватанига қайтариш учун «Айкол-4» гуманитар миссиясини амалга оширди. 8 декабрь куни 31 нафар аёл ва 65 нафар бола ўз ватанига қайтди. Бу ҳақда Қирғизистон ТИВ матбуот хизмати хабар берди.
96 кишидан иборат гуруҳ Бишкекка махсус самолётда учган.
«Қирғизистон томони ушбу гуманитар жараённи муваффақиятли амалга ошириш учун махсус операция ўтказишда ҳар томонлама ёрдам кўрсатаётгани ва логистик кўмаги учун Америка Қўшма Штатлари ҳукуматига, шунингдек, Бирлашган Миллатлар Ташкилотининг Болалар жамғармаси (ЮНИСEФ) ва Халқаро Қизил Хоч Қўмитасига оғир ҳаётий вазиятда қолган фуқароларни ватанига қайтариш бўйича тўртинчи йирик кампанияни ўтказишда ёрдам бергани учун миннатдорчилик билдиради», — дейилади ТИВ баёнотида.
ℹ️ «Айкол» операцияси қирғизистонликларни Яқин Шарқ давлатларидан ватанга қайтариш бўйича иккинчи тадбир бўлди. 2021 йил март ойида «Мээрим» операцияси доирасида Ироқдан 79 нафар бола қайтарилган. 2023 йили «Айкол»нинг тўртта миссияси давомида 101 нафар аёл ва 232 нафар бола ўз ватанларига қайтишга муваффақ бўлди. Уларнинг эрлари ва оталарининг тақдири ҳақида хабар берилмаган.
