«Сомон Эйр» авиакомпанияси самолёти". Ижтимоий тармоқ фотосурати
Қозоғистон ва Тожикистон авиация маъмурияти икки давлат ўртасида мунтазам йўловчи қатновларини кўпайтиришга келишиб олди. Бу ҳақда 20 апрель куни Қозоғистон Республикаси фуқаро авиацияси қўмитаси маълум қилди.
Шу тариқа, Тожикистоннинг «Somon Air» авиакомпанияси 25 апрелдан бошлаб Душанбедан Олмаотага Boeing-737 самолётларида ҳафтасига иккита рейсни амалга оширади.
Қозоғистоннинг «Эйр Астана» авиакомпанияси, ўз навбатида, 1 майдан бошлаб Душанбе ва Олмаота ўртасида ҳафтасига учта рейс (ҳозирда – битта рейс), 1 июндан эса Airbus-320 самолётларида ҳафтасига 4 та рейсни амалга оширишни режалаштирмоқда. Шу тариқа, июн ойида мамлакатлар ўртасидаги рейсларнинг умумий сони ҳафтасига иккидан олтитага кўтарилади.
Қайд этилишича, парвозлар «санитария-эпидемиология талабларига қатъий риоя қилган ҳолда ҳамда авиакомпаниялар сайтларида эълон қилинган жадвалга мувофиқ амалга оширилади». Қозоғистон фуқаролари ва хорижликлар учун COVID-19 учун ПЦР тести салбий натижаси бўлган сертификат ёки коронавирусга қарши эмлашнинг (ревактсинация) тўлиқ курсини тасдиқловчи ҳужжат/паспортнинг мажбурий тақдим этилиши сақланиб қолади.
11 апрелдан бошлаб Қозоғистон Республикаси давлат чегарасини ҳаво орқали кесиб ўтишдаги барча чекловларни олиб ташлади ва Россия, Қирғизистон ва Ўзбекистон билан қуруқликдаги чегараларни очди. Энди Тожикистон фуқаролари бу республикага нафақат ҳаво, балки қуруқлик орқали ҳам боришлари мумкин.
