russian.news.cn сайти фотосурати
Хитой биринчи марта кўп фойдаланиладиган «Чжуцюэ-3» ракета-ташувчисининг биринчи босқичини қуруқликка муваффақиятли қўндирди. Парвоз 19 август куни эрталаб мамлакат шимоли-ғарбидаги Дунфэн космодромидан амалга оширилди, деб хабар беради «Синьхуа».
«Чжуцюэ-3-Y2» (Zhuque-3, ZQ-3) ракетаси Пекин вақти билан соат 7:35 да учирилган. Биринчи босқич ажралганидан сўнг, у очиладиган таянчлар ёрдамида бошқариладиган қўнишни амалга оширди. ZQ-3 ракетасининг иккинчи босқичи парвозни давом эттириб, «Хунху-3» сунъий йўлдошини орбитага олиб чиқди.
Ракетани Хитойнинг хусусий аэрокосмик компанияси LandSpace ишлаб чиққан. «Чжуцюэ-3» икки босқичдан иборат бўлиб, узунлиги 66,1 метр, корпус диаметри эса 4,5 метрни ташкил этади. Биринчи босқич ўзгарувчан тортиш кучига эга бўлган тўққизта TQ-12A кислород-метан двигатели билан жиҳозланган. Ракета суюқ кислород ва метанда ишлайди ҳамда Ерга яқин паст орбиталарга юкларни чиқариш учун мўлжалланган.
Мутахассисларнинг фикрича, унинг муваффақиятли синовдан ўтказилиши Хитойнинг паст Ер орбитасидаги сунъий йўлдошлар гуруҳини ривожлантириш жараёнини тезлаштириши мумкин.
Аввалроқ, 10 июль куни Хитой биринчи марта «Чанчжэн-10B» (Long March 10B, CZ-10B) ракета-ташувчисининг биринчи босқичини денгиз платформасига муваффақиятли қайтарганди. Синов мамлакат жанубидаги Хайнань оролида ўтказилди. Ракета-ташувчи Вэньчан космодромидан учирилди, босқичлар белгиланган тартибда ажратилгандан сўнг, биринчи босқич бошқариладиган тарзда пастлади ва тўрли қўниш тизими ёрдамида махсус денгиз платформаси томонидан муваффақиятли ушлаб қолинди.
Ўша пайтда маҳаллий ОАВ биринчи босқичнинг муваффақиятли қўндирилишини Хитой космик дастури учун тарихий босқич деб баҳолаган эди. «Хитой дунёда (АҚШдан кейин. — “Фарғона” изоҳи) ракета-ташувчининг биринчи босқичини вертикал равишда қайтариш технологиясини ўзлаштирган иккинчи давлатга айланди», — дея таъкидлаган журналистлар.
