economist.kg сайти фотосурати
Жорий йилнинг январидан сентябрига қадар Қирғизистонда ўртача ойлик номинал иш ҳақи 42 757 сомни (деярли 489 доллар) ташкил этди. Ўтган йилнинг дастлабки уч чорагига нисбатан бу кўрсаткич 19,5 фоизга ошди, деб хабар беради «Кабар» ахборот агентлиги Республика Миллий статистика қўмитасига таяниб.
Бироқ, агентлик жорий ҳисоб-китобларга кичик бизнесдаги иш ҳақи тўғрисидаги маълумотлар киритилмаганлигини таъкидлаган.
Инфляцияни ҳисобга олган ҳолда, мамлакатда реал иш ҳақи 10,9 фоизга ошганлиги таъкидланмоқда. Бу доимий иш билан банд бўлган фуқароларнинг харид қобилиятининг реал ошганлигини кўрсатади, деб таъкидлайди Миллий статистика қўмитаси.
Ойлик иш ҳақининг ўсишида ижобий тенденциялар барча иқтисодий фаолият турларида кузатилмоқда. Кўчмас мулк билан боғлиқ битимлар етакчилик қилмоқда, бу соҳада иш ҳақи деярли 36 фоизга ошган. Қурилиш 34,7 фоизга ўсиш билан иккинчи ўринда туради.
Кейинги ўринларда:
✅ Маъмурий ва ёрдамчи фаолият – 29,1 фоизга ўсиш;
✅ Касбий, илмий ва техник фаолият – 29 фоиз;
✅ Давлат бошқаруви ва мудофаа, шунингдек, мажбурий ижтимоий таъминот – 26,9%;
✅ Соғлиқни сақлаш ва ижтимоий хизматлар – 26,2%;
✅ Меҳмонхоналар ва ресторанлар – 24%;
✅ Молиявий воситачилик ва суғурта – 18,3%.
Статистика қўмитаси жорий йилнинг дастлабки уч чорагида иш ҳақининг барқарор ўсиши ва иқтисодиётнинг аксарият асосий тармоқларида меҳнат бозоридаги позицияларнинг мустаҳкамланиши кузатилганини таъкидлайди.
Шуни таъкидлаш жоиз, ҳукумат қарорлари уй хўжаликлари даромадларига таъсир кўрсатган бўлиши мумкин. Масалан, 2025 йил баҳорида Қирғизистон президенти Садир Жапаров хавфсизлик кучлари ходимларининг маошлари 1 июлдан бошлаб 35% га, шартнома асосидаги ҳарбий хизматчиларга тўловлар эса 1 сентябрдан бошлаб шунча миқдорда ошишини эълон қилганди.
Республика раҳбарияти минимал иш ҳақини доимий равишда оширишни режалаштирмоқда. Шу йил бошида давлат раҳбари ушбу миқдорни 2025 йилда 2865 сом (32,70 доллар), 2026 йилда 3280 сом (37,50 доллар) ва 2027 йилда 3670 сом (42 доллар) қилиб белгиловчи қонунни имзолади.
