Европа Иттифоқи Кенгаши Россияга қарши 21-санкциялар пакетини қабул қилди. Унга мувофиқ ҳарбий-саноат мажмуасидан тортиб банк тизимигача бўлган турли соҳаларда фаолият юритувчи корхоналарга чекловлар жорий этилди. Европа Иттифоқи сайтида эълон қилинган ҳужжатга кўра, рўйхатга Россия ҳукумати билан ҳамкорлик қилаётган Марказий Осиё, жумладан Қирғизистон ва Қозоғистон компаниялари ҳам киритилган.
Рўйхатдан Қирғизистоннинг «ЭкоИсламикБанк» ҳам ўрин олган. Европа расмийлари фикрича, мазкур банк Россиянинг аллақачон чекловлар жорий этилган Молиявий хабарлар алмашиш тизими (СПФС)дан фойдаланган. Шу муносабат билан Европа Иттифоқи юрисдикциясидаги компанияларга ушбу банк билан ҳар қандай операцияларни амалга ошириш тақиқланади. Санкциялар жорий йилнинг 13 августидан кучга киради.
Россия ҳарбий-саноат мажмуасини қўллаб-қувватлашда гумон қилинаётган компаниялар рўйхатига Марказий Осиёнинг бешта корхонаси киритилган. Санкциялар Қирғизистонда рўйхатдан ўтган учта юридик шахс — «Нова Проект», «Рама групп» ва «Шисан»га нисбатан жорий этилган. Шунингдек, Қозоғистоннинг икки компанияси — Остона шаҳридаги «ТауКЗ» ва Павлодардаги «КБР Технолоджис» ҳам ушбу рўйхатдан жой олган. 24 июлдан бошлаб мазкур ташкилотларга нисбатан кучайтирилган экспорт назорати жорий қилинади.
Умуман олганда, ушбу рўйхатдан 51 та компания ўрин олган. Улар қаторида Ҳиндистон, Хитой, Бирлашган Араб Амирликлари, Гонконг ва Туркияда рўйхатдан ўтган компаниялар ҳам бор.
Алоҳида бандда чегаралараро молиявий тармоқ A7 ҳамкорларига нисбатан чекловлар назарда тутилган. Ғарб таҳлилчилари фикрича, мазкур тармоқ узоқ вақтдан буён Россия банк тизимини қўллаб-қувватлаш ва яширин тўловларни, жумладан криптовалюта орқали ҳисоб-китобларни амалга ошириш учун қўлланиб келинмоқда.
Бу сафар санкциялар тармоқнинг Африкадаги бўлинмаларига, шунингдек Қирғизистон, Грузия, Панама, Бирлашган Араб Амирликлари, Беларусь ва Маршалл оролларида рўйхатдан ўтган яна 14 та платформага ҳам татбиқ этилган.
Европа Иттифоқида янги чекловлар рўйхати сўнгги тўрт йил ичидаги Россияга қарши энг йирик санкциялар пакети деб баҳоланди. Унда 170 та ташкилот ва 48 нафар жисмоний шахс киритилган. Бундан ташқари, 94 та банк ва молиявий институтнинг активлари музлатилган, 33 та кредит ташкилоти ҳамда қатор криптовалюта платформалари билан операцияларни амалга ошириш тақиқланган. Санкциялар ҳарбий-саноат мажмуаси, энергетика, тоғ-кон ва металлургия тармоқлари корхоналарига, «соя флоти» кемаларига ҳамда бир нечта аэропортга ҳам нисбатан жорий этилган.
