Лев Скорякин.Sotavision телеграм-канали фотосурати
Москванинг Гагаринский туман суди Бишкекдан ўғирлаб кетилган «Сўл блок» фаоли Лев Скорякинни 500 минг рубль миқдорида жаримага тортди ва суд залида қўйиб юборди. Бу ҳақда Sotavision Telegram-канали хабар берди.
Скорякин тергов изоляторида ўтирган муддати туфайли жазодан озод қилинган. Ҳукм эълон қилинар экан, суд уни белгиланган жаримани тўлашдан ҳам озод қилган. Шу билан бирга, прокурор судланувчига 5 йил умумий режимдаги колонияни ўташни сўраган.
Суд мажлисида Скорякин айбловга тўлиқ рози бўлган: «Мен айбимни тан оламан, гувоҳлик беришдан маъно кўрмаяпман». У, шунингдек, охирги сўзни айтиш ҳуқуқидан бош тортган: «Бу масалада охирги сўз яқин орада айтилмайди, шунинг учун бундан воз кечаман», деган. Айбланувчи адвокатининг айтишича, унинг ҳимоячиси «қўл силтаган ва курашишни истамайди».
Суд залидан чиққан Скорякин журналистларга Қирғизистондан қандай ўғирлаб кетилгани ҳақида гапириб берган.
«Тунда бостириб киришди, олиб кетишди, тун бўйи айланиб, бир аэропортдан бошқасига олиб боришди... Тўққиз соат давомида улар ҳеч ким билмагандек айланиб юришди. <...> Шу ерда ўзимизникилар калтаклашди. У ерда [Бишкекда] инсонийлик бор эди, улар ҳақида қандай ўйлашимдан жуда хавотирда эдилар. Доим шикоятингиз йўқми, деб сўрашарди», — дейди фаол.
ℹ️ Скорякин 2021 йил декабрь ойида Москва жанубий округидаги Федерал хавфсизлик хизмати (ФХХ) биносига ҳужум уюштириш бўйича айбланувчи ҳисобланади. Ўшанда фаол Руслан Абасов билан биргаликда ФХХ биноси олдига «Чекист куни муборак» баннерини ёйиб, терговчиларнинг сўзларига кўра, бино томон ёнаётган файерни улоқтирган. Иш бўйича айбланувчилар пойтахтнинг Гагаринский суди томонидан ҳибсга олинган, олти ойни тергов изоляторида ўтказишган, шундан сўнг уларнинг эҳтиёт чораси муайян ҳаракатларни тақиқлаш билан алмаштирилган. 2023 йил январига келиб иккала фаол Россияни тарк этган. Шундай қилиб, Лев Скорякин Қирғизистонга кетишга муваффақ бўлган. 2023 йил июнь ойида у Россия талабига биноан ҳибсга олинган. Скорякин тергов изоляторига жўнатилган, бироқ сентябрь ойида қўйиб юборилган. Мамлакат Бош прокуратураси фаолни Россияга экстрадиция қилишдан бош тортган, бироқ октябрь ойи ўрталарида Скорякин ўғирлаб кетилган ва ватанига келтирилган. У Москвадаги «Бутирка» тергов изоляторига жойлаштирилган.
