Тожикистондаги ТИВ биноси. asiaplustj.info сайти фотосурати
16 сентябрь куни Тожикистон ҳукумати Қирғизистоннинг фавқулодда ва мухтор элчиси Эрлан Абдилдаевни Қирғизистон расмийсининг умумий чегара масалалари бўйича баёнотларини муҳокама қилиш учун Ташқи ишлар вазирлигига таклиф қилди. Бу ҳақда Тожикистон ТИВ матбуот хизмати хабар берди.
Хабарда айтилишича, элчига Тожикистон томонининг 15 сентябрь куни «Қирғизистон олий мулозими» томонидан тожик-қирғиз чегараси масалалари бўйича ахборот майдонида берган баёнотлари юзасидан хавотирлари ҳақида маълумот берилган.
«Бундай мулоҳазалар тожик-қирғиз чегарасини делимитация ва демаркация қилиш бўйича музокаралар жараёнининг боришига ҳамда ўзаро ишончга жиддий зарар етказиши олиб таъкидланди», — дея таъкидлайди вазирлик матбуот хизмати.
Ташқи ишлар вазирлиги «юқори мартабали мулозим»нинг исмини айтмади, аммо, эҳтимол, гап Қирғизистон Бош вазири ўринбосари ва ушбу республика Миллий хавфсизлик давлат қўмитаси раиси Қамчибек Ташиев ҳақида кетмоқда. 15 сентябрь куни у Тожикистон ҳукуматини ҳудудий даъволардан воз кечишга чақирганди.
«Биз яқинда янги ҳужжатларни топдик, унга кўра кўплаб қирғиз ерлари Тожикистонга ўтказилган. Буни тарихий ва ҳуқуқий ҳужжатлар билан исботлашимиз мумкин. Агар қўшни давлат ҳудудий даъволаридан воз кечмаса, биз ҳам даъво қиламиз. Бунинг учун бизда етарли куч ва имкониятлар бор», — деди Миллий хавфсизлик давлат қўмитаси раҳбари.
Ташиев бу ҳақда 2022 йил 15-16 сентябрь кунлари Боткен вилоятида юз берган чегара можаросининг бир йиллиги муносабати билан баёнот берди. Расмий тўқнашувларга чегара билан боғлиқ ҳал этилмаган муаммолар сабаб бўлганини тушунтириб, «қўшни давлат мамлакатга ҳужум қилганини» қўшимча қилди.
ℹ️ Тожикистон-Қирғизистон чегарасининг узунлиги 976 километр бўлиб, шундан атиги 664 километри делимитация ва демаркация қилинган. Баҳсли ҳудудларда икки давлат аҳолиси ўртасида йўллар, сув ва ердан фойдаланиш бўйича келишмовчиликлар мунтазам пайдо бўлади. Охирги қуролли можаро 2022 йил сентябрида бошланганди: умумий чегаранинг бир нечта участкаларида отишмалар бошланган. Бир неча кун давом этган тўқнашувлар натижасида ҳар икки томондан кўплаб қурбонлар ва жароҳатлар бўлган. Икки республика ҳукумати бир-бирини қуролли босқинчиликда айблаганди.
