СССРнинг биринчи ва ягона президенти Михаил Горбачёв вафот этди

Михаил Горбачевнинг Афғонистон президенти Муҳаммад Нажибулла билан Тошкентдаги учрашуви, 1988 йил 7 апрель. mytashkent.uz сайти фотосурати

30 августдан 31 августга ўтар кечаси СССРнинг биринчи президенти Михаил Горбачёв 91 ёшида вафот этди. Бу ҳақда Горбачёв шифокорлар назорати остида бўлган Марказий клиника шифохонасига (МКШ) таяниб, ТАСС хабар берди.

«Михаил Сергеевич Горбачев оғир ва узоқ давом этган касалликдан сўнг вафот этди», — дейилади МКШ хабарида.

Россия ахборот агентликлари собиқ президентнинг яқинларига таяниб, Горбачёв коронавирус пандемияси бошланганидан бери Марказий клиника шифохонада шифокорлар назорати остида бўлганини хабар қилади.

Горбачёв Москвадаги Новодевичье қабристонида рафиқаси Раиса Горбачева ёнига дафн этилади. Дафн маросимининг санаси ҳали аниқланмаган.

Михаил Горбачёв 1931 йил 2 мартда туғилган. М.В.Ломоносов номидаги Москва давлат университетининг юридика факультетини тамомлаган (1955), 1967 йили Ставрополь қишлоқ хўжалиги институтининг (ҳозирги Ставрополь давлат аграр университети) сиртқи бўлимини тамомлаган. 1952 йили КПСС аъзоси, 1971 йилдан партия Марказий Қўмитаси аъзоси. КПСС Марказий Қўмитасининг сўнгги Бош котиби ушбу лавозимга 1985 йилда Константин Черненко вафотидан кейин сайланганди.

Михаил Горбачев ошкоралик ва қайта қуришнинг асосий ташаббускорига айланганди. Унинг ташаббуси билан 1989 йил февраль ойида Совет қўшинлари Афғонистондан олиб чиқилди.

У 1990 йил март ойида Совет Иттифоқининг биринчи ва охирги президенти лавозимини эгаллаганди.

1991 йил 19-21 августда бўлиб ўтган давлат тўнтариши ва СССР мавжудлигини тугатиш тўғрисидаги Беловежская битимлари имзоланиши (8 декабрь) Горбачевнинг истеъфога чиқишига олиб келди . У 1991 йил 25 декабрда президентлик ваколатларидан воз кечди.

У 1990 йили тинчлик бўйича Нобель мукофоти совриндори бўлганди. СССР президентлигидан кетгач, Горбачев ижтимоий ва адабий фаолият билан шуғулланган, ҳатто реклама роликларида ҳам суратга тушган.

ШУНИНГДЕК ЎҚИНГ