Эмомали Раҳмон. president.tj сайти фотосурати
Тожикистон президенти Эмомали Раҳмон тожик маҳсулотларининг Европа бозорларига экспортини кенгайтиришга умид билдирди. Бу ҳақда Президент матбуот хизмати хабар берди.
Раҳмонга кўра, Европа Иттифоқи билан ҳам икки томонлама, ҳам кўп томонлама асосда муносабатларни изчил ривожлантириш Тожикистон ташқи сиёсатининг устувор йўналишларидан биридир.
«Марказий Осиё ва Европа Иттифоқи ўртасидаги муносабатларни чуқурлаштириш бўйича «Йўл харитаси» минтақалараро ҳамкорлик ва ўзаро боғлиқликни кенгайтиришни тартибга солувчи асосий ҳужжатга aйланди. Биз тожикистонлик ишлаб чиқарувчилар маҳсулотларини Европа бозорларига экспорт қилишни, жумладан, ўзаро савдо имтиёзларидан фойдаланиш орқали янада кенгайтиришни мақсад қилганмиз», — деди Тожикистон президенти.
Эмомали Раҳмон, шунингдек, саноат, табиий ресурслар, энергетика ва қишлоқ хўжалиги соҳалари имкониятлари ва салоҳиятини эслатиб, Тожикистон сармоя жалб қилиш, янги технологиялар ва Европа компанияларининг бу соҳадаги тажрибасини жорий этишдан манфаатдор эканини маълум қилди.
Хусусан, Европа Иттифоқининг энергетика (шу жумладан «яшил» энергия), қишлоқ хўжалиги, саноат, транспорт ва коммуникация инфратузилмаси соҳаларидаги лойиҳаларни молиялаштиришдаги иштироки муҳимлиги таъкидланди.
«Тожикистон учун энергетика соҳаси, яъни гидроэнергетикани ўз ичига олган қайта тикланадиган энергия манбалари нафақат миллий ижтимоий-иқтисодий эҳтиёжларни қондириш, балки минтақавий ҳамкорликни янада ривожлантириш учун ҳам долзарбдир», — деди Эмомали Раҳмон.
Сиёсатчи Европа Иттифоқининг Нурек, Себзор ва Қайроққум ГЭСлари лойиҳаларини амалга оширишдаги муваффақиятли иштирокини алоҳида таъкидлади.
Бундан ташқари, Европа Иттифоқига икки томонлама асосда ёки «Глобал даввоза» ташаббуси доирасида «яшил» иқтисодиёт ва энергетика намуналари бўлган гидроэнергетика иншоотларини қуриш ва модернизация қилишда инвестор сифатида иштирок этиш таклиф этилди.
«Биз 2032 йилгача Яшил иқтисодиётни ривожлантириш стратегияси асосида мамлакатда қайта тикланадиган манбалардан электр энергияси ишлаб чиқаришни тўлиқ таъминлаш, 2037 йилгача Тожикистонни «яшил» давлатга айлантириш ниятидамиз», — деди Раҳмон.
Тожикистоннинг глобал муаммоларни ҳал қилиш, жумладан, музликларни муҳофаза қилиш борасидаги глобал ташаббусларини эслатиб, мамлакат президенти жорий йил май ойи охирида Душанбе шаҳрида ушбу масала бўйича юқори даражадаги биринчи халқаро конференция ўтказилиши режалаштирилганини таъкидлади.
Раҳмон шу жумладан, таълим соҳасидаги ҳамкорликни кенгайтириш, жумладан, Тожикистонда Европа университетларининг филиалларини очиш ва тожикистонлик абитуриентларнинг Европа таълим муассасаларида таълим олиши учун квоталар кўпайтиришдан манфаатдор эканини билдирди.
ℹ️ Самарқанд биринчи «Марказий Осиё – Европа Иттифоқи» саммити ўтказиладиган жойга айланди. Унинг иштирокчилари орасида Европа кенгаши президенти Антонио Коста, Европа комиссияси президенти Урсула фон дер Ляйен, Ўзбекистон президенти Шавкат Мирзиёев, Қозоғистон президенти Қосим-Жомарт Тўқаев, Қирғизистон президенти Садир Жапаров, Тожикистон президенти Эмомали Раҳмон ва Туркманистон президенти Сердар Бердимуҳамедов бор. Саммит «Келажакга сармоя киритиш» шиори остида ўтказилмоқда.
