altyn-orda.kz сайти фотосурати
Қозоғистонда сайғоқларни ов қилиш яна тўхтатилди. Бу ҳақда Экология ва табиий ресурслар вазири Эрлан Нисанбаев маълум қилди, деб ёзади Tengrinews.kz.
«Сайғоқларни отиш маҳаллий олимлар ва халқаро экспертлар билан маслаҳатлашув ва муҳокамалардан сўнг тўхтатилди. Бундан ташқари, қиш вақти — даштда ҳаракат қилишда қийинчиликлар пайдо бўлган. Шунинг учун 10 февралдан бошлаб сайғоқлар сонини тартибга солиш жараёнини тўхтатдик. Ўтган йилги ҳайвонлар инобатга олиниб, бу йил май ойида синчковлик билан батафсил ҳисобот ўтказилади», — деди мулозим Мажилис кулуарида.
Унинг таъкидлашича, бу ҳайвонларни 10 февралдан кейин овлаш ноқонуний ҳисобланади.
Шу билан бирга, вазир Қозоғистонда сайғоқлар сони тез орада 2,5-2,6 миллион бошга етиши мумкин бўлган прогнозни келтирди. Ҳайвонларнинг Ўрол популяциясининг кескин ўсиши ва «ўтлаш имконияти» этарли эмаслиги сабабли сайғоқларни отиш келгуси йили қайта тикланиши мумкин.
Қозоғистондаги сайғоқлар узоқ вақтдан бери давлат муҳофазасида бўлган. Уларнинг сони маҳаллий тиббиётда қўлланиладиган шохларини учун браконерлар томонидан сезиларли даражада камайган. 2022 йил июнь ойида ўша пайтдаги Экология вазири Сериккали Брекешев Қозоғистонда сайғоқлар популяциясини тиклаш режаси ортиғи билан бажарилганини, бироқ уларнинг сони шунчалик кўпки, ҳайвонлар маҳаллий фермерлар ҳаётини қийинлаштира бошлаганини айтган. Натижада сайғоқлар популяциясини 10 фоизга қисқартиришга, яъни 80 минг бошни йўқ қилишга қарор қилинган. Бу жамоатчиликнинг норозилигига сабаб бўлган. Президент Қосим-Жомарт Тўқаев ҳам бу қарорни танқид қилган, бироқ уни бекор қилмаган.
Ўтган йил кузида Қозоғистонда сайғоқларни расмий равишда отиш бошланганидан бери «Охотзоопром» давлат инспекторлари ушбу ҳайвонларнинг қарийб 22 минг дона шохи йиғиб олингани хабар қилинган. Февраль ойида «ушланган» сайғоқларнинг сони 42 мингдан ошган.
