massa.az сайти фотосурати
Қирғизистон ҳукумати визасиз режимда бўлган хорижликлар республикада яшаш муддати тугагандан сўнг қўшни давлатга чиқиб, дарҳол қайтиб келишлари мумкин бўлган visa-run режимини бекор қилди. Энди улар маълум бир муддат кутишлари керак — камида 60 кун. Ташқи ишлар вазирлиги ташаббуси билан 10 октабрь куни Вазирлар Маҳкамаси қонун ҳужжатларига тегишли ўзгартишлар киритди, деб хабар беради Ташқи ишлар маҳкамаси матбуот хизмати.
Аниқлик киритилишича, visa-run олиш ўрнига бошқа механизмлар ишлайди. Шундай қилиб, 60 кунгача визасиз режимдан фойдаланадиган чет элликлар учун «60/120» схемаси қўлланилади. Бу шуни англатадики, талаб қилинган муддат тугаганидан кейин меҳмон Қирғизистонни тарк этади ва жўнаб кетган кундан бошлаб 60 кун ўтгандан сўнг республикага қайтиши мумкин бўлади.
Шунга ўхшаш амалиёт мамлакатда 90 кун давомида қўшимча ҳужжатларсиз қолиш имкониятига эга бўлган хорижий фуқаролар учун ҳам тегишли бўлади. Бундай ҳолда, белгиланган муддат тугагандан сўнг, «90/180» тамойили кучга киради, яъни қайтиш учун шахс камида уч ойлик танаффус қилиши керак бўлади.
Шу муносабат билан Ташқи ишлар вазирлиги хорижликларни Қирғизистонда қолишларини олдиндан режалаштиришга чақирди. Департамент виза ёки бошқа рухсатномалар, масалан, яшаш учун рухсатнома ёки рўйхатдан ўтиш республикадан чиқмасдан ҳам берилиши мумкинлигини эслатади.
Ҳукумат томонидан «Хорижий фуқароларнинг Қирғизистонда бўлиши тўғрисида»ги низомга киритилган ўзгартиришларга кўра, чиқиш визаси нархи оширилмоқда. Агар илгари ҳужжатни расмийлаштириш 5020 сўм (70 АҚШ доллари) ни ташкил этган бўлса, эндиликда консуллик хизматларини кўрсатиш учун йиғим миқдори мамлакатда бўлиш муддатидан ошиб кетган вақтга боғлиқ бўлади:
✅ уч ойгача — 8800 сўм ($100);
✅ уч ойдан олти ойгача — 13 200 сўм (150 доллар);
✅ олти ойдан бир йилгача — 17 600 сўм ($200);
✅ бир йилдан ва ундан кўп — 22 000 сўм ($250).
Қирғизистон Ташқи ишлар вазирлигининг таъкидлашича, янги чоралар республика ҳукуматининг «миграция оқимини янада самарали бошқаришни таъминлаш ва мамлакатнинг умумий хавфсизлигини яхшилаш» га доир интилишини акс эттиради.
