Рашид Раҳимов. tass.ru сайти фотосурати
Россия ФМЛ чемпионати иккинчи дивизионида тўп сураётган Қозоннинг «Рубин» клубига тожикистонлик мутахассис Рашид Раҳимов бош мураббий этиб тайинланди.
Раҳимов клуб бош мураббийи лавозимида россиялик Юрий Утқулбоевнинг ўрнини эгаллади, у ўтган йил ноябрь ойидан буён жамоани Леонид Слуцкий кетганидан кейин бошқарган эди.
Инсайдер Иван Карповнинг сўзларига кўра, Раҳимовнинг «Рубин» билан шартномаси мавсум охиригача мўлжалланган. У яна бир йилга узайтириш имкониятига эга бўлади — агар клуб РПЛга кирса.
«Шунингдек, Рашид синфдаги клубни янгилагани учун анчагина мукофот олади», деб ёзади Иван.
26 турдан кейин 47 очко тўплаган «Рубин» турнир жадвалида иккинчи ўринда бормоқда ва бу эса кейинги мавсумда РПЛга кириш ҳуқуқини беради. Қозонликлар учинчи ўриндаги Красноярскнинг «Енисей» клубидан уч очко олдинда, аммо турнир пешқадами Калининграднинг «Балтика»сидан олти очко ортда қолмоқда.
Қайд этиш лозим, узоқ вақт давомида Қозон «Рубин»ини туркманистонлик мутахассис Қурбон Бердиев бошқарган, спорт директори эса тожикистонлик Мухсин Муҳаммадиев бўлган. Ҳозирча жамоанинг аризасида ўзбекистонлик икки нафар футболчи – Рустам Ашурматов ва Умарали Раҳмоналиевлар бор.
Рашид Раҳимов асли Душанбе шаҳридан. Футболчи сифатида 1982 йилдан 1991 йилгача Душанбенинг «Помир» жамоасида ўйнаган. 1992 йили у Москванинг «Спартак» клубига, кейин эса Испаниянинг «Валядолид» жамоасига ўтади. 1993 йили у Россияга қайтади ва Москванинг «Локомотив» клуби билан шартнома имзолайди ва у ерда бир мавсум, кейин эса яна бир мавсум «Спартак» билан ўйнайди. 1995 йили Раҳимов Австрияга кўчиб ўтади ва у ерда 2002 йил фаолиятининг охиригача «Аустрия», «Адмир» ва «Рид» жамоаларида ўйнаган. Шунингдек, у Россия ва Тожикистон терма жамоаларида ўйнаган.
У мураббийлик фаолиятини «Адмир»да бошлаган. 2006 йили Раҳимов Россияга қайтиб келади ва Пермнинг «Амкар»ига раҳбарлик қилади. Йиллар давомида «Локомотив», «Аҳмат», «Уфа» клубларида ишлаган. 2021 йили Уфани тарк этгач, у тез-тез «Матч ТВ» телеканалида эксперт сифатида ишлаган.
